巴西一名年僅五歲男童患有罕見嘅遺傳病，體重已達175磅（79.3公斤），係正常男童身形嘅三倍。事關太重，男童隨時有可能係瞓覺時窒息而亡。據英國《每日鏡報》報道，阿布勒（Misael Abreu）出世時重6.6磅，屬正常體重，但好快就開始長肥，到佢約一歲半時更加係每月增磅6.6磅，情況驚人。醫生相信阿布勒係患上罕見、俗稱「小胖威利症」嘅普瑞德-威利氏症候群（Prader-Willi Syndrome），係一種基因缺陷引起嘅遺傳性疾病，緣於第15條染色體變異，以致患者大腦唔識發出飽肚嘅訊號，無時無刻都喊肚餓。
為改善體重，阿布勒開始進食父母安排嘅低脂餐單，每日行路40分鐘，但仍每月增重四磅。同時，阿佈雷現時每三個月睇次醫生，但唔好彩噉「小胖威利症」目前無法根治。阿布勒嘅父母直言「我哋將會隨時失去佢」，但佢哋拒絕放棄同認命，將會盡一切所能改善阿布勒嘅生活。
下載APP