劉德華（華仔）監製兼主演的新戲《掃毒2：天地對決》於香港啟德郵輪碼頭花費五個多月時間、搭建了1:1的中環港鐵站。日前，華仔和片中主要演員古天樂（古仔）、苗僑偉（三哥）、應采兒、周秀娜及衛詩雅等齊齊現身「中環港鐵站」舉行電影宣傳活動。 （文：植筱詩）
劉德華、古天樂和苗僑偉在新戲中大鬥演技。
《掃毒2》一班主角齊齊現身「中環港鐵站」廠景，舉行電影宣傳活動。
活動現場，華仔透露和古仔在新戲中既是壞人，又是好兄弟，兩人將會在「港鐵站」場景有撞車的戲份。問到兩人的造型，古仔直言要保持神秘感：「總之就長頭髮、有鬚同埋身體有缺陷。」不過他在戲中有超過十個女朋友，是戲中之冠，笑言同個個都有親戲，但床戲欠奉。華仔自爆在片中起初會紮髻：「好似古裝咁，返到屋企畀爸爸問我係咪拍古裝，我仲駁髮駁咗四日，都幾好玩。」
劉德華和古天樂在新戲中既是壞人，又是好兄弟。
古天樂大爆在片中有超過十個女朋友。
華仔15年冇搭港鐵
問到兩人多久沒有搭過港鐵？古仔坦言入行後就無坐過港鐵：「十幾20年喇，拍戲都無去過港鐵站，而家有得搭都唔識路。」華仔則表示：「我起碼15年無搭過，不過沙士之後有得戴口罩就好啲，有時趕時間過海都會搭去中環，我都想揾個機會再搭下。」在旁的三哥建議：「你帶埋個女去搭下囉。」華仔聞言則扮惡謂：「你多事！」
三大男神齊鬥Chok
華仔、古仔和三哥都是出名男神，但華仔笑指片場內以三哥最Chok，三哥反指他們才是最Chok：「我點會Chok得過佢哋兩個呀？劉生『Chok先』，古仔都唔弱.，我就Chok佢哋兩個囉。」三哥透露，戲中三人會在「港鐵站」有飛車鏡頭，亦會到真的地鐵站拍攝，他又指自己平日都會搭港鐵，亦不會戴口罩，更不介意被市民集郵，他打趣謂別人看得起才會找他集郵。
苗僑偉指自己搭港鐵不會戴口罩，亦不介意被粉絲集郵。
三哥與古仔首度合作
三哥與古仔都從影多年，但原來今次是兩人首度合作，三哥表示：「好開心同影帝古仔合作，要跟佢學下嘢，佢的確非常專業，一埋位就入到戲。同華仔就已經差唔多十年冇合作，感覺好特別。大家都識咗咁耐，但唔係經常可以合作，特別珍惜今次可以一齊拍戲。」作為後輩的衛詩雅，在戲中飾演三哥的下屬，有不少同場的機會，她大讚三哥專業之餘，更教她不少演戲技巧。
苗僑偉與古天樂都從影多年，但原來今次是兩人首度合作。
華仔即場派定心丸
華仔年前曾因墮馬受重傷，而《掃毒》上集有不少動作畫面，不免令人擔心安全措施是否足夠。對此，華仔即場大派定心丸：「今次對體能的要求較低，現今又有很多電腦技術，令整個拍攝安全很多。」早前，有小行星以劉德華、古天樂、張國榮及梅艷芳命名，華仔自言是看新聞才知道，他笑謂：「其實呢啲星星多過人類，係人都可以有自己粒星星。」古仔則表示十分幸運：「無諗過有粒星係我個名，好榮幸嘅，喺星海之中有粒星係我，同家人講下都係好好嘅紀念。」
劉德華完全沒有因受過傷而減少親身上陣，敬業依然。
有小行星以劉德華及古天樂命名，兩天坦言十分幸運。
下載APP