四年一度的球壇盛事世界盃進行得如火如荼，不少藝人都十分關注賽事，杜汶澤揚言賭到「輸身家」， 但都不及梁漢文（梁炳）撼穿頭爆缸陰功豬！身為足球發燒友的梁炳，日前相約朋友到卡拉OK睇波，在中場休息唱K期間跣腳頭撞檯角，當場流血不止，即時入院。 （文：植筱詩）
梁漢文睇波期間撼穿頭，傷口七吋長深至見骨。
阿根廷球迷杜汶澤則揚言賭到「輸身家」，在荷包上重傷。
梁炳前日凌晨於Instagram貼出一張住院的照片，相中他額頭貼住大大塊紗布，並發文表示：「心血來潮打畀我兄弟，佢咁啱喺卡拉OK，當時我的感覺直情係緣分到了，可以一齊睇波、點知意外就係意外，冇得解釋，竟然可以一邊唱住人哋想我唱嘅〈一世一次戀愛〉、個頭直接撞落枱（檯）角，流血不止。」經過一輪討論後，他指翌日要做一個大手術，令粉絲十分擔心。
梁漢文貼住大大塊紗布的照片，向粉絲交代事發經過。
掛住唱K跣腳
梁炳指今次撼爆頭實屬無妄之災，他表示：「出去睇波，到半場時，朋友想我唱首歌聽，唱咗幾句，原來前邊有一級，咁就仆咗埋去，照咗腦無乜事，但今朝要做手術。」問到為何要做大手術？他解釋：「因為個傷口好深，唔係話撼一撼，喺個額頭度都有好幾吋，詳細唔識形容，等醫生搞。」
梁漢文透露月中會按原定計劃，去俄羅斯睇世界盃。
笑言鴻運當頭
完成手術後，梁炳向媒體交代傷勢，他透露縫了37針，傷口7吋長，深至見骨：「要做嘅嘢都做晒，要等傷口復原，而家等埋單同出去食嘢，都好肚餓。多謝大家關心。」問到會否覺得運滯？他笑言：「呢啲叫鴻運當頭！啱啱出院，鬼打無咁精神，照舊頂頭鎚都得，13號會照飛去俄羅斯睇世界盃。」
梁漢文指醫生為了令傷口癒合後更美觀，一共縫了37針。
下載APP