張敬軒（軒仔）前晚於香港紅館的演唱會去到尾場，軒仔在台上致詞多謝各合作單位。不過要講到全晚最爆，莫過於再請到已經做過演出嘉賓的Boy'z成員關智斌（Kenny）與張致恒（Steven），兩人再度臨時被叫上台，令現場觀眾激動尖叫。其實除了和「密友」Kenny演出外，軒仔亦多次感動落淚，由於觀眾反應熱烈，個唱延至11時58分超時完場。
張敬軒於香港紅館的演唱會尾場，軒仔在台上致詞多謝各合作單位。
張敬軒再請關智斌和張致恆擔任嘉賓，搞到「紅館核爆」兼成為全城熱話。
在演唱會慶功宴上，軒仔心情似乎仍未平伏，談及搵Kenny做嘉賓，他表示：「上一次嘅效果係犀利啲，今晚大家都見到佢哋坐咗喺度，係我親自搵佢哋兩個，一搵就應承，本來Steven要開工都專登飛番嚟。」問到如何答謝對方，軒仔笑言：「一路都係等緊合適機會，畀大家同台，我哋係講心。」
關智斌和張致恆著上演唱會Tee，和張敬軒在後台合照。
開唱前認真剃腳毛
談及「降兩度」的造型，軒仔笑稱：「我本人就係斯文啲嘅，而『降兩度』把口就賤啲，所以有個分身係好玩嘅。」他透露每天表演前都會花時間認真剃腳毛：「咁有啲睇唔到嘅位咪唔剃囉，即係格肋底呀！原來剃腳毛都要成個鐘，要換兩塊刀片。鬚都好啲，腳因為想佢睇上嚟有光澤就著絲襪，但啲毛太粗試過刮爛對絲襪，真係女人唔易做。」
對於網民指找胡定欣做嘉賓失望，張敬軒替好友抱不平。
承認同Kenny有來往
早前，有傳聞指軒仔和Kenny「斷交」，問到兩人是否再見亦是朋友？軒仔表示：「其實一直以嚟我哋都冇減少來往，只不過係有時啲報道，唔想講太多，費事答咗之後越描越黑。」軒仔指兩人從來無減少來往：「我哋咁多年都係好好、好好嘅朋友，係好Close嘅朋友，關智斌唔需要因為張敬軒而見報，同樣張敬軒亦都唔需要因關智斌而見報，所以都係封口唔講嘅原因。」軒仔並逐一多謝容祖兒、陳慧琳、楊千嬅、胡定欣任個唱嘉賓，問到可有留意網民說找胡定欣做嘉賓有點失望？軒仔表示：「網上嘅意見值得參考，但單睇幾個留言就唔係咁公平。」
張敬軒否認同Kenny「斷交」，指兩人從來無減少來往。
下載APP