唔少體壇名人退休之後都會尋找新嘅人生道路，對於舊年收山嘅「不敗拳王」美韋達嚟講，退休生活除咗只有「食玩瞓」三個字之外，當然唔少得嘅就係「炫富」！飛機、跑車、鑽石同銀紙樣樣都晒，搞到網友個個勁「葡萄」！
或者美韋達人生的一大樂趣，就係「炫富」。（互聯網圖片）
美韋達眾多「玩具」之一。（互聯網圖片）
去年9月同「菲律賓拳王」帕奎奧打完世紀之戰後，美韋達拎住一大筆籌金收山去。唔再係拳手，美韋達樂得清閒，如何打發時間好？當然就係請一大班美女坐佢架私人飛機遊山玩水去！
講到呢架私人飛機就唔講得笑，美韋達豪擲3,000萬英鎊買返嚟，都唔知係一般打工仔幾多世人工。未知係咪驚人唔知架飛機係屬於佢嘅關係，美韋達更特別用上自己個名為架機命名，仲頻頻放相上社交網站同大家一齊開心Share。
私人飛機再配上一大棚靚女，美韋達退休生活真寫意。（互聯網圖片）
皮帶扣及手機殼也鑲鑽，很想要吧？（互聯網圖片）
錢未花光無意復出除飛機之外，美韋達嘅名車同鑽石亦經常會喺其社交網站中「亮相」，閃耀程度令人為之側目！當然，最叫網友咬牙切齒都係佢老哥愛晒銀紙，閒閒哋都幾十疊100蚊美金擺出嚟！仲寸到搵銀紙當床鋪瞓上去，服未！
早排有消息話，美韋達可能會復出，佢亦承認曾獲得多個邀請；不過，佢都依然一一拒絕，原因係佢相當滿意家陣嘅無憂生活。拳迷要再次見到美韋達喺擂台上嘅風采？相信都要等到佢洗到乾塘至有機會咯！
下載APP