巡邏（ 上）

在澳門六、七十年代，松山一帶，除了高高的燈塔外，幾乎沒有任何的街燈。唯一一支，就在現在花心公子那位置附近，所以那個年頭的松山，一到晚上就會完全黑暗。一般市民，是不會無故走上去的，而居住在附近的人，晚上一般也不會出門。出沒的，只有非一般的市民──警察。

輝仔剛剛在警察學堂畢業，對巡邏的每一個環境，都不是太熟識。雖然在學堂裡，也曾聽說過很多邪門的傳說，但對年青不懼虎的新人來說，所有的傳聞，都只是一些故事而已。

「輝仔，今晚你和老成去巡邏松山。」上司說。

「無問題。」輝仔一口答應說。

「好，嗰頭無乜燈，要小心。重有，我知警隊好多人都話嗰頭有鬼，你哋唔好自己嚇自己就可以了。」上司說。

「長官，因為無燈，所以可能會有很多人打劫，因此我們更加應該去保護市民。」輝仔答。

「老成，今晚要照住啲後生。」上司望著老成說。

「得啦，都差唔多夠鐘，我哋出去先。」老成說。

「好，出去做嘢。」上司說。

輝仔收到上司的指示，敬禮後就和老成走出房門，準備去整理裝備出發。

「成哥，那邊很黑的，要不要多拿一支電筒？」

「電筒冇用，好快就冇電，用呢個啦！」老成從櫃桶內掏出一紮香，說。

「嘩！有冇咁邪啊！」輝仔驚訝地回應。

「呵呵！用來照明一定好好用。」老成笑著說。

「師兄攞得出來的，實有你嘅道理。好了，要出發。」輝仔說，

「出發！」

老成說話後，立刻衝出房間，大步向大門口前進，只是走到一半，他突然又停了下來，接了個電話，談了幾句後，便走進去上司的房間。

「老細，啱啱屋企打電話來，話我老母入咗醫院，你知，年紀大，有啲嘢話行就行，好難講……」老成對著上司說。

「得啦！我明白，你去啦。」

「係啦，要唔要叫輝仔去其他地方，得佢一個，我怕出事。」老成說。

「梗係唔得啦，最近嗰邊有幾單劫案，上頭壓力都好大，如果唔係咁，都唔會調人過去巡邏。」

「咁樣……」

老成思考了一會，接著又說：「不如搵多個人陪佢去啦。」

「咩情況，你最清楚，重有邊個會肯去？你本來已經係最佳人選。」上司說。

「咁啊……」

「咁放心唔落，拉埋你同佢一齊去。」上司說。

「咪玩啦。」

「唔係去鏡湖咩？再講咁耐，就唔似有急事啦。」上司笑了笑說。

「係，多謝長官批准。」

老成敬禮後，走出房外，向著阿輝的方向走過去，說：「阿輝，唔好意思，屋企有事，我要去醫院睇睇。」

「哦，咁你快少少去，家人緊要。」輝仔回答。

「唉！今晚靠你一個頂住啦。」老成不好意思地說。

「客氣，兄弟要互相照應嘛。」

「好啦，我都要出發。」輝仔說話後，向老成揮手，快步走向門口。

「阿輝。」老成叫停了阿輝，接著走過去，問：「有冇打火機？」

「冇啊。」輝仔答。

「攞住啦。」老成將兩個打火機交給輝仔。

「我都唔食煙，畀我冇用喎。」

「唔係畀你食煙，係要你幫人哋點煙。」老成解釋。

「哦！刷鞋三式之一，幫老闆點煙。」輝仔笑著說。

「唔係，係點香照明。」老成說。

「得啦，咁長氣，你快啲去睇你阿媽啦。」

「好啦，咁麻煩你啦。」

「好，再見。」輝仔說話後，走出門外，一步步地走向目的地。

從警廳一出門口向右走，就是一道斜坡，斜坡再上就是山頂醫院，醫院再走幾分鐘，就到達整個山頭之中，唯一一盞的燈。

輝仔趁天色尚未進入全黑，就走上松山的路徑，深深吸了口氣，望著將快結束的日落餘暉，內心不禁發出一聲感嘆。

「澳門夜色真係靚。」輝仔自言自語地說話後，送別了最後的彩光，迎接漆黑的夜晚。

黑夜，已沒收了太陽最後的一點霞光。

月色，挑逗起了狼狗的吠叫聲。

密雲，封閉夜空。

寒氣，漸漸地入侵輝仔的體內。

作者：岸南

60年代的仁伯爵綜合醫院 。（互聯網圖片）

60年代的松山。（ 互聯網圖片）