今年港澳兩地賀歲檔票房一面倒，由黃子華主演的《棟篤特工》大熱勝出。反觀內地爭持激烈，梁朝偉坐陣的《捉妖記2》開頭領先，但口碑影響後勁。隨即彈出一套《唐人街探案2》，但林超賢執導的《紅海行動》最近開始異動，票房亦已超過30億，單日票房更開始拋離其他對手，有望後來居上成為冠軍。而電影於港澳上映後，排片量不斷飆升，即將衝破千萬港元大關，因此台前幕後都十分雀躍。
林超賢執導的《紅海行動》內地票房已超過30億人民幣。
繼《湄公河行動》後，林超賢今次再度挑戰軍事題材。
對於新戲大收，與團隊正身在日本旅行慶功的林超賢十分開心，談及電影的拍攝過程，他坦言有「肉眼可見」的辛苦：「電影反應理想，梗係好開心。電影拍攝地方環境惡劣，加上呢個戲比較特殊，台前幕後要捱足五個月，中途所有人都唔可以離開，全無退路，直至完成拍攝為止。呢個戲考驗嘅係你嘅意志能唔能夠承受住。」
新戲大收，與團隊正身在日本旅行慶功的林超賢十分開心。
於賀歲片中跑出
《紅海行動》於賀歲片中成功跑出，被拿來和同題材的《戰狼II》作比較，不過大部分觀眾覺得《紅海行動》場面更殘酷，大大增強電影真實感。對此，林超賢坦言是拍《湄公河行動》總結出來的經驗：「之前同有關部門經過好複雜同好多次會議，過程好漫長。所以來到《紅海行動》，雙方有信心就順利得多。整體而言，係一啲軍隊上嘅規矩問題，如果不涉及藝術表達或劇情方面，佢哋好尊重我哋嘅諗法。」
坦克大戰是片中一大賣點，令觀眾看到熱血沸騰。
忍痛剪走22分鐘
電影以138片長上映，看後的觀眾無不覺得好滿足。但林超賢透露電影的第一版其實長達160多分鐘，但片長關係要忍痛剪走22分鐘︰「有好多軍艦上嘅戲分被剪咗，所以實際拍攝過程中，更多戲分現時觀眾睇唔到。」如今電影叫好又叫座，被譽為可媲美荷里活大製作的戰爭動作片，林超賢笑言：「看到這個效果，之前我們經歷的辛苦，一切都煙消雲散了。好多觀眾同我講，電影感染力好強，看完後真的熱血沸騰！」
《紅海行動》被內地媒體譽為為近年中國軍事電影的代表。
完夢拍攝戰爭片
《紅海行動》近日於港澳兩地上映後，同樣反應熱烈，林超賢表示，好的迴響是代表獲得觀眾的認同。問到電影於農曆新年上映，會否怕影響票房？他笑言：「雖然新年適合睇啲輕鬆戲，但我哋呢個勝在有口碑，上映後就有網民討論。」林超賢指，今次是完夢拍攝戰爭片，又自爆拍攝期間發生意外：「拍攝過程唔可以以血汗嚟形容，係歷盡艱辛，為想要嘅效果重愈玩愈大，身邊同事都有受傷，不過一切都值得。」
《紅海行動》場面殘酷，大大增強電影真實感。
林超賢在片場會全副裝備上陣，相當投入。
曾擔心血本無歸
談及上映前是否有擔心票房，林超賢坦言都會驚：「套戲成本好高，今次又用咗好多新人，都怕血本無歸。（下次會拍咩題材？）呢個都係每次遇到嘅問題，唔知下次可以玩咩，有好多嘢都係可遇不可求，之後可能會現實啲。」問到何時回歸港產片？林超賢表示：「一直都有諗故事，但都要看時機，自己始終都係香港成長嘅導演，所以都會思念港產片。」
林超賢坦言電影拍攝成本高，都怕血本無歸。
下載APP