美國職棒大聯盟（MLB）雲集世界頂尖棒球高手，水準同競爭激烈程度，足以媲美美國職業籃球聯賽（NBA）。中國人向來都對MLB唔會話太過關注，但從今開始就可能有所改變，皆因年僅19歲嘅中國球員許桂源，已正式宣布簽約加盟MLB著名球隊巴爾的摩金鶯。呢個小朋友有著「棒球界姚明」嘅稱號，究竟係咪可以喺阿美利堅攞到同姚明一樣咁大嘅成就，確係令人期待！
許桂源剛簽約加盟MLB球隊金鶯，以小聯盟作起步點。（互聯網圖片）
躋身金鶯一隊，是許桂源的奮鬥目標。（互聯網圖片）
為咗向外推廣棒球運動，MLB自2009年9月開始，陸續喺中國無錫、鄭州同南京等城市設立技術發展中心，今次金鶯隊宣布從附屬嘅無錫技術發展中心引入許桂源，亦可以話係史上首次，因而成為一時佳話。
具深厚潛質嘅許桂源，早喺2010年畀大聯盟亞洲發展部簽下時，仲係一名左投手；不過，之後被發現佢原來有住打擊嘅天賦，所以就將佢改造成為擊球手，目前主要肩負鎮守外野同埋一壘。
咪睇許桂源只係得19歲仔，佢喺過去幾年已經贏過唔少獎項，2011年拎咗深圳棒球聯盟「打擊獎」同「最佳進步獎」，翌年就贏得「中國青少棒聯盟全壘打大賽」冠軍！
以躋身一隊作為目標
雖則有唔少傳媒都話，許桂源今次能夠有幸登陸全球水準最高嘅MLB，完全係MLB同金鶯嘅宣傳技倆，旨在進軍龐大嘅中國市場。之但係，佢就一於好少理，更話要以躋身金鶯一隊作為終極目標。
視日本名將鈴木一朗為偶像嘅許桂源，喺赴美加入春訓之後，將會再被分發去到小聯盟出賽。係咪可以繼姚明同林書豪之後，成為另一個可以震撼美國體壇嘅中國運動員？大家拭目以待！
金鶯亦透過網絡公布喜訊。（互聯網圖片）
下載APP