為咗給予F1參賽車手最佳嘅保護，國際汽聯較早前就通過革新建議，落實喺2017年賽季正式引入名為「halo」嘅半封閉式座艙蓋！法拉利車隊早幾日更已經進行首次測試。對於呢一個新變革，車手反應梗有讚亦有彈，而作為車迷就似乎反應就較大，指加咗個「halo」，架F1冇咁型仔，仲話似足小朋友玩嘅四驅車，你又點睇呢？
F1加上「halo」，網友戲言搞到成架小朋友玩嘅四驅車咁款。（互聯網圖片）
國際汽聯有呢個決定，全因巴西車手馬沙喺2009年一次嚴重意外受傷而起，當時馬沙喺匈牙利站排位賽中，畀賽道上嘅汽車碎件擊中頭部，令人再次關注到車手喺比賽中嘅安全問題。
大大話話傾咗幾年時間，國際汽聯到最近終於落實要喺下賽季開始要加多個名為「halo」嘅半封閉式座艙蓋，總算係為車手做番啲嘢！不過咁，好多人對呢個新產物都有唔同意見，法拉利車隊嘅拉高倫試過後，就畀個正評，話「halo」結構對車手嘅視線影響唔多，保護性亦足夠；平治車隊嘅羅斯保亦話裝咗「halo」令成架車更酷！
不過咁，作為連續兩屆總冠軍嘅「黑帝」咸美頓，就給予「halo」100%負評，話呢件嘢簡直係多此一舉，令戰車睇起嚟極之樣衰咁話。當然，給予負評嘅又點少得網友，個個話搞到本身以型仔行先嘅F1戰車成架小朋友玩嘅四驅車咁，唔知下次會唔會轉玩「海綿肽」或「48,000轉摩打」咁話！
座艙蓋除咗試過嘅半封閉式Y型設計外，仲有全封閉式透明廂設計，網友話裝呢款艙蓋，就更加似四驅車！（互聯網圖片）
下載APP