澳門茶都算多元化，無論Local奶茶、中國各地名茶乃至英國紅茶，基本上一落街就飲到。但想飲得招積，飲茶之餘順便學返幾手「茶道」，可能就要搵搵地方。三盞燈嘅「汴京茶寮」，雖然地方細細，但原來店員對茶葉有相當認識，而負責人Justin更係首位考獲日本江戶千家流茶道證書嘅澳門人，絕對係「好茶保證」嘅生招牌。
澳門特製荷花茶
雖然澳門冇茶園，但係Justin就自創咗極具澳門特色的「冰點荷花銀露」，做法參考清代沈復的《浮生六記．閒情記趣》。選用中國白茶中的極品「銀針白毫」，然後如文中所記，在「夏月荷花初開時」將茶葉包好並置於花心，再存放九個時辰（約18小時），讓茶葉完全吸收花香，再「烹天泉水泡之」。茶寮將茶品在傳統的基礎上做成夏日凍飲，都同樣「香韻尤絕」，花香清幽之餘也纏繞不散。「銀針白毫」本身的清新口味更能突顯荷花清香，入口醇和柔滑，將中國茶的美態完整展現出來。
冰點荷花銀露 MOP 98「冰點荷花銀露」準備好後，就會奉上「百合根和菓子」，食完和菓子後再飲茶，淡淡蓮子味混和著茶的清香縈繞在唇齒間。（李國星攝）
茶品入樽時會再放一片荷花瓣，增強花香。
茶葉先放在荷花花心中吸收香味起碼18小時，花香自然更濃。
Justin在去年獲得日本江戶千家流茶道認證資格，是澳門第一人。
獨有福岡八女煎茶
一杯好茶，最重要係有靚茶葉。作為茶藝專家，Justin對於茶葉要求甚高，十分重視茶葉產地。就像「東洋風味」系列「八女煎茶」，原材料就源自九州福岡的「八女」，茶寮直接向當地農夫攞貨，喺澳門亦屬少有。「八女煎茶」入口較為順喉，香味緩緩而至，茶味層次十分豐富，餘韻久久不散。唔少喜愛傳統日本茶的粉絲都慕名而來，嗒一口純正「八女煎茶」。較大路的「宇治煎茶」就採用京都宇治著名品牌「祇園辻利」的出品，茶香濃郁，入口醇厚，回甘濃烈，夏天作為冷飲，效果亦相當不錯。
抹茶雪糕MOP 38 抹茶雪糕面顏色頗深，抹茶味較濃。
一口冷泡茶MOP 5 店主每周挑選私房茶，點茶後會奉上一口份量茶湯，有點像西方的Espresso 文化。
如果點「焙茶鮮奶」等奶類飲品，所盛的紙杯均會印上澳門詩人的詩句， 一邊飲茶，一邊賞詩，甚有雅興。
中國各地名茶
除了日本茶道外，Justin亦有兼修中國茶道。餐牌當中「傳統之味」系列有多款中國茶飲，譬如杭州的「西湖龍井」，茶色翠綠澄清，芳香持久，口味甘鮮溫和。而「九曲紅梅」雖然與龍井一樣來自杭州，不過睇名就知佢其實係紅茶，而且茶如其名，茶色酷似紅梅，茶香濃烈，味道濃厚，愛好中式紅茶者一定要試。而烏龍則選用臺灣四季烏龍，茶色竹黃而清澈，茶香帶有鮮花芳香，入口清爽，冷暖飲用都合適。除此之外，亦有中國各地不同茶種，如福建大紅袍、潮汕「鳳凰單欉」等，讓大家足不出澳就品嚐到全國茶滋味。
下載APP