人稱「旦哥」嘅著名主持人鄭丹瑞，近年最為人熟悉嘅節目就係TVB嘅《你健康嗎？》，呢個系列仲一再添食到第四輯。不過，旦哥去年8月約滿TVB後，忙於拍電影同音樂劇。正當觀眾以為冇機會再喺TVB見到旦哥時，原來佢又有新節目要出街。今次旦哥會同樂壇天后鄭秀文（Sammi）合作訪談節目《心情約會》，一連六集訪問過去曾患過情緒病嘅藝人。
鄭秀文相隔四年再度主持節目，令不少粉絲相當期待。
早前，旦哥於微博貼出同Sammi嘅合照漏口風，佢話：「終於有機會同Sammi合作一個非常有意義的節目，所以笑到見牙唔見眼！」其實Sammi 過往都有喺TVB主持節目，不過就以音樂節目居多。今次相隔四年再度主持訪談節目，仲係關於情緒病嘅話題，相信Sammi會再講到佢過去患抑鬱症嘅心路歷程，以親身經歷鼓勵情緒病人走出陰霾。
鄭丹瑞於微博貼出同鄭秀文嘅合照漏口風。
下載APP