洪永城同唐詩詠拍拖兩年，感情穩定。早前，堪輿學家麥玲玲指兩人今年會拉埋天窗，唔結嘅話就要等多幾年，更有傳好友C君幫唐詩詠擇日結婚。不過，日前唐詩詠出席活動時否認話：「冇諗結婚，睇緣分，結婚係一時嘅衝動，好難估計，可能會閃婚。不過，真係要揀啱先決定結婚，唔係為咗怕冇而去決定結婚，單身總好過揀錯老公，老公係一世嘅。」
洪永城同唐詩詠於社交網上發文，齊齊否認分手傳聞。
唐詩詠嘅報道出街後，網上即時盛傳「唐詩詠拒嫁洪永城」、「兩人感情亮紅燈」等傳聞。對此，身為男友嘅洪永城就唔抵得頸， 佢喺Facebook發文反擊：「睇嚟要Post親密相先代表我哋好好， 要Post同女朋友可愛對話先代表我哋無問題，如果唔係本身冇事都畀新聞講到好似有事。」女友唐詩詠仲加把口，佢話：「可能要拍片先得。」
唐詩詠話未計劃嫁洪永城，導致網上盛傳兩人感情亮紅燈。
下載APP