吳業坤急刪留言

日前，港鐵發生縱火案傷亡慘重，吳業坤（坤哥）事後在Facebook留言：「當然是要拍片放上網緊要過逃生啦！」其後可能知道自己抽錯水，所以短時間就把留言刪除。昨日，吳業坤出席東華三院慈善晚宴，被問到留言叫人拍片一事時，他解釋只是想「曲線諷刺」只顧拍片的人，並非全心抽水。

吳業坤評論港鐵發生的縱火案，並叫人「先拍片後逃生」。

對於在網上叫人「先拍片後逃生」一事，吳業坤回應：「曲線諷刺啫！除咗作為一名藝人，我都係一名市民，見到新聞指有位洋人掛住拍片吸入濃煙要急救，其實我想說如果有緊要事發生，都要依逃生指示離開，不要阻礙救援。不過太諷刺又怕人誤會，所以刪除咗。」

吳業坤出席東華三院慈善晚宴，被問到留言叫人拍片一事。

祝願傷者早日康復

被問到網民對於他諷刺此事的反應，吳業坤說：「冇人話我，咁我都祝願受傷嘅朋友早日康復。冇人想件事發生。（有冇網民話你抽水？）唔覺得係抽水，大家個價值觀係咪扭曲咗？分享趣事係好，但危險嘅事唔應該為呃like而做，雖然我成日都呃like，但係無傷大雅，我唔會整人，唔係幸災樂禍。」

在TVB工作多年的吳業坤，近年才正式上位受人注目。

多次網上留言出事

把留言刪除後，吳業坤坦言以後留言會更小心，想清楚先會寫，因為大家對這些事都好敏感，會抽秤其中一兩個字眼。吳業坤亦自嘲多次在網上留言搞出大頭佛。有記者就問他是否之前「吃好西」那次？吳業坤表示：「嗰句無傷大雅，平時朋友間討論都無問題，但如果公開，就有好多人有唔同睇法，不過都多謝大家關注我。」

吳業坤已多次留言惹禍，當中包括「吃好西」。