早前，歌手吳業坤接受網絡紅人健吾訪問，講到點解今年咁多haters，健吾就爆吳業坤曾經講過：「如果我聽日死咗嘅話，個市會唔會好似對待陳僖儀咁對待我？」結果引嚟網民嘅圍插，直指佢拎死人去宣傳。噚日，吳業坤出席公開活動被問到呢件事，佢就話：「我100%肯定我冇講過啲咁嘅嘢，冇提到人名，因為我自己拍片都會避忌啲，但係如果令大家唔開心，我會向大家講聲對唔住。」
歌手吳業坤否認消費陳僖儀一事。
問到吳業坤到底喺節目入面講過啲乜？佢就話：「我同健吾私下有傾偈，佢都話我好灰，但我唔想製造話題，個live都係得百幾人睇，如果想製造話題，我會喺網上打啲嘢，可能傾偈嘅時候，有啲自己諗法加咗入去。」此外，吳業坤仲話：「大家係睇到張圖就去諗呢個人，定係了解咗先會去諗呢個人，或者大家睇完晒之後，冇原因憎我都可以。」問到會唔會同陳僖儀家人道歉？吳業坤覺得唔應該特登做呢件事：「但如果佢哋有唔開心，我會親自向佢哋道歉。」
問到吳業坤會唔會主動向陳僖儀家人道歉，佢話唔會刻意咁做。
下載APP