唔少人對朱古力又愛又恨，鍾意食又怕肥，但若然用喺身上就唔同講法，說的是四季酒店為迎接冬日而推出的「迷人巧克力」水療療程，利用可可豆作磨砂，再用朱古力醬滋潤身體，令肌膚重拾光澤，係咪聽到個名已經想即刻預約呢？今期睇小記親身試做先！
四季酒店備有14間水療室，附有獨立淋浴間，夠光猛寬敞，予人自然放鬆感覺。 （黃詠思攝）
多年來已經有大量研究指，食朱古力可以令腦部釋放「安多酚」，令人感到開心，咁做埋個Spa令身心同樣舒暢就更爽喇！「迷人巧克力」療程全程120分鐘，開始前，按摩師先為小記按摩足部，令血液循環，頓時成個人都放鬆晒。然後，再進行約30分鐘的可可豆身體磨砂按摩，去除死皮，刺激膠原生長，可可豆粒子超幼細，感覺溫和，重點是一邊按摩一邊散發陣陣可可香氣，搞到人好想食朱古力。
磨砂膏蘊含可可、椰子油及椰殼等成分，特別潤。
接著再來一個體膜，將朱古力醬塗滿全身，包裹30分鐘。朱古力醬以可可、澳洲堅果油、杏仁油及荷荷巴油調製而成，蘊含豐富的補濕成分。一開始擔心將身體密封起來會很侷促，但原來朱古力醬質地很輕薄，容易吸收，完成後渾身都很水潤。療程特別把60分鐘的按摩部分放到最後，以肉桂精油按摩全身，肉桂香氣能刺激免疫系統，令心情更放鬆，按摩則可紓緩肌肉緊張，做完皮膚明顯有彈性咗！
體膜有排毒功效，能減輕水腫，雖然一下子做完未見特別顯瘦，但水潤度滿分！
按摩師手法融合中西特色， 客人亦可按需要提出要求。
敷體膜時，按摩師會為客人按摩頭部，超貼心！
info
時間：0900-1100
價錢：平日MOP 1,988起/ 周末MOP 2,188起
網址：www.fourseasons.com/zh/macau/spa/seasonal_highlights
下載APP