現年49歲嘅蘇永康喺2014年同馮翠珊結婚，婚後兩人一直努力「造人」。噚日，蘇永康宣布老婆懷孕五個月，預產期係明年4月。問到係自然授孕定人工授孕？蘇永康話意外老來得子，佢話：「試咗兩年都冇，老婆都40幾歲，之前結完婚特登唔做嘢，但放成年假都試唔到，無喇喇上天跌畀我，本來諗住瀟灑啲冇就算，而家仔女都殺，呢樣要好好學習。」
蘇永康同馮翠珊結婚兩年幾，如今終於「造人」成功。
蘇永康透露老婆同好友謝安琪差唔多日子懷孕，佢話：「有日收到張繼聰報喜，佢話我搞掂喇！三個月。我話我老婆都有咗，你個女，我個仔，不如我哋玩指腹為婚。」蘇永康話而家最緊張嘅係媽媽：「我媽媽80歲，而家好似後生20年，每朝問我老婆想食乜，煲畀佢食，但老婆身體好好，唔需要特別煲嘢，而家煲多啲湯水畀佢，我哋分開食飯，因為我長期減肥，媽媽叫工人買餸整畀佢食。」
蘇永康話老婆同謝安琪（右）差唔多日子懷孕。
下載APP