Marco 演舞台劇幕後畀女圍

吳林峰、P1X3L成員葉振弘（Marco）及胡希文（YoYo）日前為11月24日起公演的舞台劇《小塵大事2023我也流淚的》綵排，眾人雖第一次合作但默契十足。首次演出舞台劇的Marco就話未背熟台詞，要從眾演員身上偷師：「其實做舞台劇對我嚟講係新嘅課題，我收到劇本時都好擔心，因為舞台劇冇得NG，而且我記對白又比較弱嘅，點知YoYo幾頁台詞一晚就背好晒，搞到自己都有壓力。」而Marco同吳林峰同屬歌手，佢都話趁機向對方自薦：「因為我都好想唱吳林峰作嘅歌，所以把握機會問佢可唔可以寫歌畀自己，剛剛鏡頭前佢話OK！」

吳林峰則笑言冇諗過參演舞台劇，他指答應演出是「純粹誤會」：「我以為監製搵我做音樂同Band，所以咪話好啦，點知要我演出做角色，搞到好奇怪咁，因為平時我MV都好少出鏡，依家上到台都唔習慣。劇中我同YoYo要做情侶，監製第一日問我底線去到邊，嚇到我唔知點算，我要問準女友先知演情侶嘅底線係咩！」吳林峰重大讚Marco聲線獨特，坦言二人會傾音樂：「雖然大家排劇都好認真，但係休息時我哋都會傾下音樂，我唔係教佢唱歌，只係分享下啲經驗交流下。」

舞台劇經驗較豐富的胡希文，佢自爆第一次劇中有感情線，又大讚對手吳林峰「君子」：「因為我哋演情侶都有啲身體接觸，稍為掂一掂佢都會『唔敢郁』，依家熟咗會自然啲啦！而Marco太可愛，好受幕後女同事歡迎，搞到我哋呢班『姨姨』母愛大爆發！」 （編輯：游子欣）

P1X3L成員Marco（左）及吳林峰（右）都是首次演出舞台劇，當中胡希文（中）便成為了前輩。（相關機構圖片）

P1X3L成員葉振弘（Marco）首次演出舞台劇，被爆在幕後極受女同事歡迎。（相關機構圖片）

胡希文大讚對手吳林峰「君子」，在有身體接觸的戲份時會唔敢郁。（相關機構圖片）