陳展鵬吳若希騙案苦主玩變聲

單文柔（小圖）驚喜客串做老千，呃真老公陳展鵬錢，可惜兩人劇中未有同框演出。（相關機構圖片）

Jinny 色誘展鵬的一場戲，性感不足卻是首集爆笑位之一。（網上截圖）

單文柔秒變通緝犯，網民指TVB神預言近日的JPEX騙案。（相關機構圖片）

由陳展鵬及吳若希飾演夫妻的TVB新劇《香港人在北京》昨晚（9日）首播，最大彩蛋絕對是展鵬太太單文柔（Phoebe）客串演出。劇情講述徐港仁（陳展鵬飾）和太太鄺海倫（吳若希飾）誤墮投資騙案，身家損失慘重，該老千正正由Phoebe飾演，今次更是Phoebe首度與老公合作拍劇，不少網民更指劇情是近期的JPEX騙案「神預言」翻版，非常與時並進。

展鵬受訪時笑言：「今次係想畀個驚喜大家，Phoebe選完港姐之後就畀我私有化咗，佢其實一直都好想拍劇，亦都係我嘅小fans，好希望可以同我合作。」談到兩公婆在劇中未能同框，展鵬坦言老婆有點失望，身為愛妻號的他不忘搞笑慰妻謂：「主要係我驚佢啲戲太好，會搶咗我啲戲。」

問到太太拍攝前有否向他取經？展鵬說：「因為都係得一場戲同埋幾句對白，所以叫佢最緊要Enjoy個過程、淡定同熟讀劇本，知道場戲要做啲咩就OK。」展鵬又謂絕對支持太太多點幕前演出：「一直都好希望身邊嘅人做到令自己開心嘅嘢，唔好太多拘束，依家小朋友都開始讀書，佢可以放多啲時間畀自己，做多啲自己想做嘅嘢。」除了Phoebe、上位小花何依婷亦在首集客串報道新聞，雖然只是閃現兩個場口，但已成功吸引網友眼球，並笑指是為她有份演出的《新聞女王》預熱。

昨晚另一爆笑位，是被挑選為苦主聯盟代表的展鵬和Jinny接受《慌張西望》訪問，兩人因怕被認出、不但要求節目組為他們打格仔和做聲音處理，更自行變聲作「三重保險」，場面爆笑。談到相關場口，Jinny受訪時笑言：「呢場戲我哋睇劇本時已經忍唔住笑！我哋拍嘅時候唔係諗點樣搞笑，而係諗用咩聲線去演呢場戲，有諗過要唔要扮某啲人把聲，最後我哋就揀咗用鴨仔聲。」首度合作便默契十足的兩人，昨日還上演一場爆笑色誘戲，以性感睡衣上陣的Jinny搔首弄姿色誘展鵬失敗，有網友抵死謂畫面有喜感，但靠Jinny色誘就註定失敗云云。