李克勤中秋於澳門倫敦人與澳門管弦樂團舉行一連四場《我們的交響樂演唱會》，由於克勤父母都是澳門人，所以今次不單太太盧淑儀及兩個兒子，外父外母都來澳支持，順道一家人在澳門過中秋。
昨晚（29日）頭場， 克勤以〈月半小夜曲〉跟大家一同於舞台上賞月，聽得觀眾如痴如醉，對於有觀眾聽後在網上大讚，他謙稱：「咁我又未到天花板⋯⋯噚晚升何丙出來， 不停升，差啲就真係升左佢上天花板， 笑死我。我啲歌好多都好夾管樂，管樂升華加持再重新編曲之下，大家可能因為咁感覺到藝術性。觀眾覺得時間太短就真係好喇， 其實一啲都唔短，係個騷好睇大家先會覺得唔夠喉。」
昨晚演唱會中克勤跟觀眾互動大合唱〈紅日〉，全場近萬觀眾一齊high爆，他於舞台上說好榮幸，入行幾十年很多歌都是廣東歌，不過有幾首歌便讓不會廣東話的人，為了可以唱到而去學廣東話，〈紅日〉就係其中一個好例子，無論去到世界各地咩地方，無論佢地係講緊英文、國語、潮洲話、上海話，都識唱〈紅日〉，呢件事真係幾榮幸。唔單止帶動到廣東歌、廣東話，亦都帶到正能量畀大家。」
澳門過中秋，克勤謂以為未必有月餅食，點知去到澳門，歌迷、朋友、重有特別嘉賓梁玉瑩（表妹）都送他月餅， 「成個後台有幾十盒，真係好誇張。咁做騷我唔敢食咁甜嘢， 但都有食少少一啖仔應下節。其他留畀工作人員同屋企人食囉。」首場克勤跟觀眾打招呼大講中秋節快樂，就已經有觀眾即時大叫：「好靚仔呀！」他笑道：「咁假嘅說話你都講？哈哈。對於著衫，坦白講我真係唔識，全是太太功勞。我平日出門最多就係波衫波褲，因為不用工作出門我就係打波，哈哈。」（編輯：游子欣）
李克勤由9月29日起，一連四日在澳門倫敦人開騷。（相關機構圖片）
李克勤跟觀眾互動大合唱〈紅日〉。（相關機構圖片）
有歌迷在網上讚李克勤唱〈大會堂演奏廳〉時著的修身西裝帥到飛起。（相關機構圖片）
李克勤父母是澳門人，今次舉家來澳陪他們一起過節。（相關機構圖片）
李克勤在澳門開騷，帶埋燈籠上台與現場觀眾過中秋。（相關機構圖片）
下載APP