張天賦（MC）今年1月在香港紅館舉行的演唱會反應熱烈，而他的首個澳門個人演唱會《This is MC LIVE IN MACAU》，將會在9月30日及10月1日假威尼斯人金光綜藝館舉行，他透露今次舞臺會開足四面，年初在港演出時的超巿購物車亦會再出動。
MC曾透露在紅館騷起初的心情比較緊張，相隔半年多再開澳門站的演出，他坦言今次覺得好期待、好興奮！首次來澳開個人演唱會的他表示：「呢個係香港以外嘅第一個大型個人演唱會，好想知啲人嘅反應係咁、個場地係點，都係一啲正面嘅煩惱。今次演唱會叫《This is MC》，顧名思義係講到關於我喺音樂路上嘅影響，入面會有故事，有好多唔同類型嘅歌曲、唔同形象嘅MC畀你哋睇。」
他有信心經歷過第一次開騷後，獲得的經驗及教訓令他進步，今次會更加得心應手。問他會不會在開騷前有壓力，他答道：「最大壓力係嚟自跳舞同自彈自唱兩個環節，都會多啲練習。」
似乎一切都難不到信心滿滿的MC，談到對澳門的印象，他笑言：「覺得澳門好多好靚嘅酒店，同埋好多嘢食。其實香港同澳門兩地相距都好近，我覺得澳門嘅『賦二代』應該唔會相差太遠，希望佢哋多啲聽我嘅歌支持我，同埋介紹多啲澳門好玩同好食嘅地方畀我。」未來澳前MC已叫定本地的粉絲多介紹美食餐廳，「賦二代」們要識做了。
MC在今年上半年已推出〈世一〉、〈花海〉、〈第二人格〉及〈抽〉等四首單曲，又推出了首張大碟《This is MC》，還參與多場不同音樂會，對於今年的成績單，MC竟說對獎項沒太大期望：「坦白講，我做音樂冇為個獎出發，只係想分享多啲唔同類型嘅歌曲畀大家；可以令人感受到唔同嘅心情、唔同嘅溫度、唔同嘅時候。所以今年都係一樣做緊自己鍾意嘅嘢，希望大家都會鍾意。」 （編輯：游子欣）
MC 張天賦將於 9月30日及10月1日來澳門舉行《This is MC LIVE IN MACAU》演唱會。（相關機構圖片）
MC 張天賦 9 月底來澳開騷，已急不及待叫澳門的「賦二代」介紹本地美食給他。（相關機構圖片）
MC 張天賦目前為自彈自唱環節加緊練習中。（相關機構圖片）
MC 張天賦透露今次澳門騷亦會有勁歌熱舞。（相關機構圖片）
今次澳門的《This is MC LIVE IN MACAU》個唱會以暗黑為主題。（相關機構圖片）
下載APP