江海迦（AGA）的首個個人紅館演唱會《YOKU MOKU × AGA ONEDERFUL LIVE 2023》，昨日（26日）多位圈中好友徐濠縈、蔡一傑、蔡一智、丁子高及陳蕾等人現身支持，最矚目當然是她的未婚夫「的士邦」（鄭子邦）。
AGA身穿紅色皮褸，大騷長腿以性感造型為演唱會揭開序幕，勁歌熱舞獻唱〈Count to Ten〉及〈MAD〉。勁歌熱舞過後，AGA換上一襲由過萬顆閃石組成的銀色流蘇長裙，連升兩次key唱出〈Nights Without You〉及重新改編的〈Everyday〉及〈吃定我〉，尾奏由兩位結他手走到台上battle，令全場氣氛升溫。AGA又換上型格暗黑造型，手執結他自彈自唱從未曝光新歌〈The Lovers〉，AGA穿著半截皮褸露出小蠻腰，燈光下騷出馬甲線，展示這半年努力健身的成果。
一口氣唱完10多首歌後，AGA向大家打招呼：「多謝你哋陪我等到呢一日，等嘅過程有開心、唔開心；有希望、有失望，好似呢年嘅生活咁有起伏。我都寫咗好多歌關於darkness，請你記住唔係得你一個㗎，好多人同你一齊經歷，同大家問個好先！」演唱會有陳奕迅（Eason）與24味擔任嘉賓，Eason與AGA合唱從未曝光合唱歌〈Special One〉。AGA藉機會感謝Eason：「邀請到你做嘉賓係我嘅榮幸，音樂上你啟發我好多，我記得03年睇你演唱會，你唱到〈當這地球沒有花〉我即場毛管戙，好開心今次可以同你合作。」原來〈Special One〉10年前已寫起，Eason笑言：「好少有可以面對面多謝自己嘅觀眾，多謝你。我搵返啲email睇，原來個demo係2014年㗎！不過唔止你，好多人嘅demo我都暫時擺咗喺度，哈哈！」AGA透露錄音時二人面對面對唱，是難忘的體驗。 （編輯：游子欣）
AGA 的首個個人紅館演唱會《YOKU MOKU × AGA ONEDERFUL LIVE 2023》昨日（26日）在港開騷。（相關機構圖片）
AGA的未婚夫「的士邦」（鄭子邦）亦有現身支持未婚妻。（相關機構圖片）
（左起）陳奕迅是AGA演唱會的嘉賓之一。（相關機構圖片）
AGA的首個香港紅館騷在排除萬難後終於開得成。（相關機構圖片）
（左起）蔡一傑及蔡一智兄弟。（相關機構圖片）
徐濠縈亦到場欣賞老公陳奕迅與AGA的演出。（相關機構圖片）
下載APP