穿起皮裙的容祖兒顯得略豐滿，她否認是刻意谷胸上陣。（相關機構圖片）
老闆楊受成及經理人Mani都來澳門捧場睇騷。（相關機構圖片）
演唱會舞台使用了不少特別效果，盡顯心思。（相關機構圖片）
容祖兒表示首場澳門演唱會氣氛熾熱，歌迷熱情令她好感動。（相關機構圖片）
容祖兒（Joey）於4月份連續四個周末舉行八場《容祖兒Eternity演唱會》昨晚於新濠影匯綜藝館開鑼。Joey穿上為今次演唱會準備的七套全新歌衫，熱唱21首首本名曲，配合全新編排的舞蹈，與及多個舞台效果，又噴火又放煙火等，令歌迷尖叫不絕。她又透露首場帶埋身為澳門人的媽媽同行來澳，又大爆英皇老闆楊受成及經理人Mani也有到場一齊睇騷。
每次演唱會都追求突破，Joey於台上自彈自唱了國語歌〈小小〉雖然中間曾停頓了片刻，不過全場觀眾用掌聲鼓勵，她也能順利完成。Joey坦言自彈自唱非常緊張，因為她只學了六堂〈小小〉的樂譜，演唱會前一個月更加忙得沒有時間練習，前天她一到新濠影匯有時間就趕緊練習。她笑言：「無理由永遠彈〈啜泣〉，要學第二首歌，付出少少努力。今晚第一場有少少緊張，多謝大家鼓勵支持，順利！」
由於現場不設劃位，不少歌迷一早就到現場排隊，Joey在台上感謝歌迷對她的信心和支持，她問：「大家對座位滿唔滿意呀，睇唔睇到我啲毛孔？睇唔到係唔係？因為冇吖嘛！」她又自嘲這個爛gag已說過多次。
演唱會現場的熾熱氛圍令Joey感動，她說：「呢個騷唱得好興奮，好多嘢都好用心設計，經過重新編排，相對平時啲騷係短啲，加入了新的歌曲及跳舞，都要重新學，彈琴又係新學。」被問到性感歌衫是否谷胸上身，她回應：「我唔係谷胸，嗰條裙係皮嘅，所以唯有係咁啦！係咪想講肥咗呀？梗係冇响紅館時咁乾身，冇可能㗎！嗰個係瘦到極限。最緊要精神啦，依家太瘦亦未必係好。」
下載APP