由馬國明、陳山聰、陳展鵬（煎Pan）、江美儀及劉穎鏇（Tiffany）等人擔演的TVB新劇《隱形戰隊》將於下星期開播，據悉為打造真實感及加強視覺震撼度，劇中不少場面均是荷槍實彈；對此與監製文偉鴻（Jazz）合作無間的陳山聰，但仍坦言此劇至少有兩大挑戰：「特種部隊戲我係第一次演，重要係反恐，無論造型、身形要求都嚴格好多，包括揸槍。今次揸槍都得到好多方面嘅指導，包括武指同專業人士，同埋因為多真槍，嗰下槍聲係好猛烈，同真係會有火花，變咗好容易眨眼。Jazz成日提我哋唔好眨眼，我都算係眨得幾多嗰位。出街時你哋見到我哋冇乜點眨，係因為Jazz下咗好多苦功去剪接。」
山聰在首輪官方宣傳片曝光的「一人搶兩槍」神技，單是事前反覆練習已花了兩個月：「真正拍嘅時候都NG咗好多次，我自己都不斷要求retake，咁努力都係想帶刺激感畀觀眾。」此外，山聰又花了三個月時間健身鍛煉：「今次係我有史以來最大隻。」又大讚日日一齊操Gym的Tiffany進步神速：「其實我同Tiff同一間Gym嘅，所以變咗嗰時開始我哋已經日日都見，佢今次真係更加進步。」在劇中飾演反恐特勤隊指揮官（Commander），山聰對此笑言私下在家中也是Commander：「我呢個阿頭日日都喺屋企落order，因為係得我嗌得Jaco（陳山聰兒子）聽，所以現實生活我爸爸呢個角色都係Commander嚟。」
至於飾演奸角的煎Pan，則透露最開心是相隔12年後以「身份互換」形式再與好友馬國明合作：「我好記得我喺無綫第一套做男主角嘅劇係《真相》，當年馬國明喺最尾嗰幾集做反派，我同佢都friend，會一齊踢波又剩，當年好多謝佢支持我客串做反派，嗰時我已經講，希望將來有套劇馬明做主角時，我又可以做返反派，客串又好主位又好，呢個係我其中一個喺TVB最大心願。」談到相隔多年再演奸角，煎Pan笑指最希望觀眾能期待和覺得有新鮮感：「因為都咁多年冇做過反派，我一路以嚟最希望就係畀到觀眾新鮮感，所以做咩角色都冇所謂，反派、小角色、客串或反串都好，最緊要觀眾覺得陳展鵬有新鮮感，因為我哋一年裡面可能出幾套劇。」 （編輯：游子欣）
陳山聰首次飾演反恐特種部隊角色，他笑言林子善及唐詩詠是他自己請來的助手及服裝阿姐。（圖：陳山聰 IG）
陳山聰稱揸真槍拍劇最大難度，係要忍住唔眨眼。（相關機構圖片）
陳山聰同劉穎鏇在劇中勁多對手戲，兩個有默契之餘亦相當有喜感。（相關機構圖片）
陳山聰為了身型更符合特種部隊要求，事前花了三個月時間健身。（相關機構圖片）
陳展鵬的角色擅長玩心理，「殺傷力」超強。（相關機構圖片）
（左起）《隱形戰隊》劇中演員陳山聰、劉穎鏇、唐詩詠、馬國明、劉佩玥及林子善在鏡頭外亦相處融洽。（圖：馬國明 IG）
下載APP