近期周街都有人玩Pokémon GO，小記當然有湊熱鬧，但食飽先有力氣玩，所以在四出搜尋小精靈的同時，當然要順道搵食！今期帶各位試齊三間傳說CP值（Compact power）極高的本地餐廳，以絕招雞湯粉一比高下！
紅棗加杞子！ 榮暉超養生
位於十月初五街的「榮暉咖啡美食」早已街知巷聞，事關老闆以藥材及養生配料入饌，用料十足，一碗「馳名雞湯米」已經有齊紅棗、杞子、冬瓜及雲耳，不但有補血、明目和潤肺生津等功效，更令雞湯加倍滋補香濃。雞肉夠大塊，吸收了湯汁的精華，肉質鮮嫩無得輸。米粉夠爽口，可惜太碎缺乏嚼勁，唯有飲晒碗湯補數！
馳名雞湯米 MOP 34
雖然係三碗雞湯粉之中最貴，但足料不在話下，雞肉也是肉厚兼嫩滑。（黃詠思攝）
新鮮三黃雞！ 雄興軒勝在夠薑
想食出食材鮮味，用最簡單的煮法就實冇死。筷子基「雄興軒美食」的「鮮雞湯瀨粉」使用新鮮的三黃雞，配合薑片與鹽調味，湯底已經夠鮮味。薑片有驅寒之效，瀨粉滑溜不黐牙，配合清澈帶微辛的湯底，食完手腳即刻暖晒！另外必點瑤柱煎蛋，蛋邊煎成微焦，粒粒瑤柱充滿著鹹鮮味，絕對是誠意之作。
鮮雞湯瀨粉 MOP 21
薑塊與雞幾乎一樣多，雞湯夠鮮味，不過雞肉可以再嫩點。
瑤柱煎蛋（小） MOP 21
瑤柱煎蛋絕不欺場，煎出嚟大過小記塊面！
豬骨雞湯底！盛品客家風味
下環街小販巷新開業的「盛品下環客家雞湯瀨粉」主打客家菜。「招牌客家雞湯瀨粉」選用鮮雞和豬骨熬製湯底，配以胡椒及多款秘製材料，因此一端上檯已經香氣撲鼻。食瀨粉之前循例呷一口湯，湯汁濃郁，散發陣陣胡椒味，口味獨特，怕重口味的話或會嗆喉，不過就正合小記心意；雞肉嫩滑啖啖肉，食完覺得滿足！
招牌客家雞湯瀨粉 MOP 32
老闆娘以自家獨門秘方炮製，香料味較濃，但因為不加味精，所以不怕口乾。
下載APP