銅鑼灣的希雲街愈開愈多特色餐廳小店，食完海鮮，當然係時候去食甜品。其中就隱藏一家由北海道老闆開設的「SHARI SHARI Kakigori House 氷屋」，店仔細細裝潢簡樸，好啱坐低邊食冰邊談心。老闆Shingo四年前搬到香港，去年11月開店，「想將北海道的Freshness帶到香港」，所以連刨冰機，甚至純冰都來自日本，刨冰醬料亦儘量使用日本入口材料及自家製，非常有心。
Shingo的刨冰跟足日本做法，他調配的牛油果味好驚喜！
研發當造自家口味
刨冰口味選擇豐富，有當造的北海道惠比壽南瓜、白桃和意大利芝士蛋糕口味等，碗碗刨冰都成座山咁高。當然亦有綠茶控最愛的宇治金時味、抹茶忌廉焦糖味等，綠茶醬料由Shingo親自調配，務求呈現出更濃郁甘香的滋味。最特別有店長推介的牛油果味，用上數個新鮮牛油果、煉奶等攪拌而成的醬料，淋在鬆軟冰凍的刨冰上，好軟滑Creamy！刨冰裡還藏了曲奇碎和煉奶，食落更多層次。
除此之外，店內亦有傳統日式茶道套餐，Shingo貼心地在客人面前親自沖泡和攪拌綠茶。傳統綠茶的甘澀，配上來自北海道的和菓子，一濃一甜味道剛剛好。
日式茶道套餐，附上北海道和菓子，亦可配芝士梳乎厘或忌廉軟泡芙，最啱細細品嚐。
SHARI SHARI Kakigori House氷屋
地址：香港銅鑼灣希雲街14號
網址：www.facebook.com/ShariShari.Kakigori
下載APP