早前韓國電影《屍殺列車》屍氣逼人，率先帶頭搞熱萬聖節氣氛，不過，講到恐怖片，點可以唔提日本製造！日本人態度嚴謹，連「嚇鬼」都認真過人，嚇到「家傳戶曉」的就有《咒怨》和貞子等，簡直深入民心。適逢今年係日本大阪環球影城15周年，大搞「玩過籠萬聖節」，日間有扮裝巡遊派對，一入夜就梗係「We嘩鬼叫」嘅時候，場內共有十個大型恐怖設施，各種迷宮真係嚇到人腳都軟。自認心靈強大嘅人，一定急不及待想入去挑戰膽量！
被喪屍包圍，迫到要走入籠內、走上巴士，氣都無得唞，但喪屍們仍不罷休。 （相關機構圖片）
真人版街頭屍襲 驚嚇指數：★★
大阪環球影城的喪屍，並非困在火車上，而係埋伏於影城的每個角落，入黑之後，就會全部傾巢而出，喺街頭不斷上演好似大逃亡一樣的屍殺遊戲。這個名為「街頭喪屍」的新演出，衝出嚟的喪屍都係面容腐爛，甚至會噴鮮血同體液！無論扮相或身體動作都驚嚇度十足，更會失驚無神逼近人群埋身襲擊，令你覺得前無退路後有追屍！以為走上街邊停泊的巴士，就可以開車走人？咁就錯了，因為喪屍會從車身的四面八方不斷推進，勢要將人逼入絕境，表演更逼真到會有爆破效果、粉末翻飛等，尖叫聲響徹整個影城，真係超有真實感和壓迫感。
影城內日間有扮裝巡遊派對，遊客們都要換上哈囉喂服飾同埋化個鬼妝，先夠投入。
陰森神舍追悼會 驚嚇指數：★★★★★
有時一味核突靠嚇都未算得人驚，反而陰陰森森又詭秘的，先最令人神經緊繃。影城另一個新登場「J 驚恐園區」，就專玩懸疑，場景設定為一座藏於樂園深處的神社，受到詛咒封印。遊客只要走入荒廢村落，穿過無數暗紅色的鳥居，就會發現裡面正在舉行一個恐怖娃娃追悼會。場內供奉了好多詭異娃娃，而且儀式令人毛骨悚然，更令人害怕成為下一個被犧牲的祭品。園區內有一座步行式迷宮「崇Tatari ～活公仔的詛咒～」，更有識行識走的日式娃娃出來招呼你，而且還要走進神社內完成任務，有咩恐怖事都可以喺裡面發生，少啲心血都行唔郁啊！
走進「J 驚恐園區」的荒廢村落，單看村口門面已經覺得陰森到極。
走入被詛咒的神舍，四圍都係詭異日式娃娃，總覺得四面埋伏。
十級恐怖強迫迷宮 驚嚇指數：★×10
被譽為場內最勁爆「十級恐怖」的「Trauma 2~最恐怖實驗病棟」，上年推出即熱爆影城，參加者入場前還要簽署「誓約書」，真係有機會嚇到人留下心靈創傷。今次更有全新玩法，號稱從未有人體驗過，而且聽聞要有心理準備任鬼魚肉，場內有大量特效，如煙霧、氣味、閃光及虛擬實境影像之外，更會用到消毒酒精、搖動座椅、低頻率治療器，甚至噁心活蟲，簡直要將人推入極度驚恐的深淵！除此之外，影城內亦有各種迷宮，將經典恐怖電影借題發揮，例如「驅魔人之館」、「猛鬼街The Maze 2 」、「娃鬼Chucky 的恐怖工廠3 」和「貞子～ 被詛咒的遊樂設施～」等，真係驚嚇無悶場。
「 Trauma 2~最恐怖實驗病棟」真係唔講得笑，用盡五感嚟嚇人，有齊視覺聽覺嗅覺觸覺效果，十級恐怖！
迷宮「娃鬼Chucky的恐怖工廠3」，係娃鬼Chucky的基地，認真夠經典。
「食死人」入侵哈利波特村 驚嚇指數：★
另一邊廂的「哈利波特魔法世界」，本來陽光明媚、和平愉快的活米村，傍晚之後，突然被黑暗魔法力量籠罩。一陣厚重密集腳步聲傳來，正是黑魔王「食死人」大軍降臨，一班身穿黑斗篷的「食死人」，在村內蕩遊，企圖用黑暗力量支配成個魔法世界。呢個可謂世界首創，以哈利波特為題材的「食死人的攻擊」節目，雖然不是主打驚嚇，但連遊客都會無辜被捲入像電影一樣的情節中，可以想象自己係哈利波特的主角，都夠晒戲劇性。
一班身穿黑斗篷的「食死人」，雖然戴住面具兇神惡煞，但又幾威風。 （相關機構圖片）
霍格華茲甜品壯膽
嚇足成晚，當然要食返嘢嚟壓一壓驚。影城內有高人氣的豪華餐點「盛宴拼盤」，統統以萬聖節擺盤造型登場，豬肋骨夠Juicy，而焗南瓜又有秋天風味。更令人期待的是，可以一嚐電影《哈利波特──神秘的魔法石》裡面，霍格華茲魔法學校的迎新餐點。這個「萬聖節甜點Feist 」夠晒豐盛，一座座山形彩粒朱古力山、得意紅蘿蔔蛋糕，以及酥皮餡餅，全部都好應節，簡直可以當自己入咗霍格華茲，做咗個麻瓜魔法學生。
模仿霍格華茲的迎新餐點，食啲甜品定一定驚都好。
實用資料
簽證：持有效特區護照，可停留90天
貨幣：MOP 1 約兌JPY 13
時差：無氣溫：秋季溫度約23℃至15℃
電壓：100V（兩腳扁插）
交通：在大阪國際機場可坐約30分鐘機場巴士到「大阪車站」，再坐JR環狀線約六分鐘到「西九條車站」，轉乘JR夢咲線再坐約五分鐘，「環球城車站」下車步行約五分鐘便到。
Info
日本大阪環球影城「玩過籠萬聖節」
日期：即日至11月6日
網址：www.usj.co.jp/hk
下載APP