繼上月永利皇宮盛大開幕之後，9月就到澳門巴黎人矚目登場，自此路氹城又更添熱鬧。兩座度假城各有賣點，真係比拼激烈，眾人翹首冀盼，終於見到藍天下的巴黎鐵塔縮細版，在塔下低炒自拍，幾乎可以以假亂真，而且巴黎人內各處都充滿「真．巴黎」的氣息，唔逐點打卡點得？至於永利皇宮，單單一個音樂表演湖，就夠華麗，重可以坐纜車「擺駕入宮」，非常有派頭，而皇宮內更存放大量藝術珍品，睇到人眼花繚亂啊！
識影一定要去巴黎人七樓的觀景台，大大個巴黎鐵塔在身後，影相最威！（李國星攝）
一入大堂就見宏偉的海神噴泉，抬頭有歌劇院式室內陽台，天花有拱形壁畫，夠晒巴黎味啦。
酒店Check-in大堂，裝修十足奢華的凡爾賽宮，Check-in時簡直成個人都充滿王者之氣。
澳門巴黎人 低炒細碼鐵塔幾可亂真
耗資百億建成的巴黎人，最令人引頸以待的細碼版巴黎鐵塔，真係依足鐵塔一半大細建成，夠晒噱頭。圍住鐵塔走一圈，在鐵塔下低炒，影相效果真係會令人誤以為飛咗去巴黎，呃Like最啱。和真鐵塔一樣，巴黎人鐵塔設有觀景台，不過要由酒店主樓五樓的禮品軒行入去，經過巴黎鐵塔歷史長廊，再到售票處。票價分為兩種，一種到七樓觀景台，可以影到鐵塔最靚全相；另一種更駕勢，先經過愛情鎖橋，再坐玻璃升降機40秒內一登塔頂，以38樓高度俯瞰路氹和金沙城中心等景觀，而望向酒店主樓的角度，都有幾分巴黎氣息㗎。鐵塔第六層還有餐廳巴黎軒（La Chine），主打中菜，融合法式浪漫格局。一到夜晚，鐵塔更有幻影燈光Show，不比真鐵塔遜色，千祈唔好錯過！
法式街頭表演咪走雞
法國巴黎的街頭表演高質素就係人都知，而「巴黎人」內亦安排了各種Streetmosphere表演，行行吓就會撞到街頭畫家、默劇、真人銅像、手風琴師、魔術舞蹈表演等，睇到人唔捨得走。而酒店五樓的巴黎人劇場，備有現代舞台科技及先進音響技術，不時會有世界級娛樂表演和盛事舉行，現時就有瘋魔全球的《Thriller Live》正在公演。
香榭麗舍大街舒服好行，如遇到古代的巴黎人，記得捉住佢哋影相啊！
仿花都建築逐個捉
巴黎人大堂正門，原來係參照歌劇院所建，大堂正中的噴泉就仿照巴黎的海神噴泉設計，加埋25米高穹形圓頂天花，參考了巴黎第七區榮軍院Les Invalides的建築，將巴黎優雅歷史感一一重現。而大堂左右兩邊亦有驚喜，右邊是紅色系Check-in大堂，有大量仿凡爾賽宮裝飾，水晶燈、拿破崙有關畫作等；左邊是藍色系的酒店服務大堂，掛滿羅浮宮風格西洋畫作，又可以影餐飽。此外，大堂有電梯直達五樓，方便去到天幕版的凡登廣場，連廣場柱設計都跟到十足十。廣場連接香榭麗舍大街，雖不能同原版相比，但勝在法國著名品牌都集中在此，而且天窗透落自然光，行街都舒服啲。
巴黎人又點少得街頭表演，呢個真人銅像夠逼真，仲曉得同你單眼放電。（李寶瑜攝）
Info
巴黎人
網址：www.parisianmacao.com
巴黎人鐵塔
門票：平日MOP 98/ 成人 MOP 68/ 小童（7樓觀景台）
假日MOP 118/ 成人MOP 88/ 小童
平日MOP 168/ 成人MOP 138/ 小童（37樓觀景台）
假日MOP 188/ 成人MOP 158/ 小童
永利皇宮 纜車遊音樂表演湖
永利澳門（Wynn Macau）正門有座音樂噴泉，而上月在路氹開幕的永利皇宮，所設的表演湖就更大更華麗。佔地二萬多平方米、最深1.6米的表演湖，夜晚隔20分鐘就有水舞表演，燈光效果令水柱好似鑽石一樣咁閃，真係影相影到無停手。更特別係，永利皇宮設有觀光纜車，順時針圍住表演湖運行，既可於28米高凌空欣賞水舞表演，又有得睇埋路氹景色。遊客更可選擇在湖外或酒店南邊登車，實行華麗「入宮」。當纜車駛到偏轉塔及兩座金龍塔時，更會來個U-turn，都算有刺激位，不過就嫌十分鐘車程稍短。
永利皇宮酒店，共有1,700多間客房，可以選擇面向表演湖的房間，任睇靚景。（相關機構圖片）
纜車係永利皇宮一大賣點，在車廂內歎住冷氣聽住音樂遊湖，效果唔錯。（李嘉儀攝）
花奔藝術價值連城
永利皇宮以花為主題，宮內隨處可見四花瓣標誌，裝潢亦非常金碧輝煌。一進皇宮，就會見到一座巨型鋼鐵雕塑，色彩鮮豔奪目，作品名為《鬱金香》，出自美國先鋒藝術家Jeff Koons的《慶典》系列，創作時間橫跨近十年，價值不菲。而每走一段路，就會見到各種藝術品，如著名美國花卉設計師Preston Bailey，用咗成千上萬花卉，創作出旋轉木馬和摩天輪等作品，聞說每季更會推出新主題，大家拭目以待。另外，除西方藝術，皇宮內又點少得中式藝術珍藏，例如一套四件的「巴克勒公爵花瓶」，是稀世的中國清朝陶瓷，真係隨時要準備定相機呀！
美國藝術家Jeff Koons的雕塑作品《鬱金香》，七彩閃亮的表面反射現場環境，非常前衛。
Info
永利皇宮
網址：www.wynnpalace.com/tc
觀光纜車
費用：MOP 100/位
下載APP