鄭秀文在騷上大晒美腿，以性感造型示人！
鄭秀文與Shimica（左）表演新歌。
全場歌迷向鄭秀文大叫「生日快樂」。
鄭爸爸生前與愛女鄭秀文感情要好！
昨日（19日）是樂壇天后鄭秀文（Sammi）49 歲生日，Sammi非常疼錫歌迷，每年生日都會與他們慶祝，今年亦不例外，前晚在香港九展Star Hall舉行迷你音樂會，與近3,000位「三米飯團」歌迷進行一場特別的生日派對，預祝生日，又唱又跳，有笑有淚兩小時，非常盡興。席間，當Sammi提到自己已故的爸爸時，送上一曲給對方，唱到眼濕濕，場面非常感動。同時，Sammi的靚相日前隨音樂平台活動，登上美國紐約時代廣場大屏幕廣告，為她的生日贈慶。 （文：黎永樂）
音樂會以〈我們的主題曲〉揭開序幕，Sammi說：「咁多年嚟我喺音樂同電影角色都不斷新嘗試，怕悶，想挑戰自己。今次新碟試咗不同音樂風格。」然後Sammi就與香港說唱女歌手Shimica表演新歌〈新造的人〉。Sammi更將舞台交予Shimica，演唱她自己創作的歌曲〈In My Dreams 〉。
之後台上亦首播了Sammi形容是入行30年以來最喜愛的新歌〈無人島〉MV，她在MV中以全新造型跳現代舞。
全場大叫「生日快樂」
直到生日歌響起，舞台中間轉出坐在粉紅色梳化的Sammi，她捧著生日蛋糕，全場齊聲大叫「生日快樂」。她說：「今年係我最後一年四字頭生日，多謝你哋為我慶祝。望到台下嘅螢光棒，一點一點，你哋就好似螢火蟲咁，一小點一小點咁凝聚對我嘅愛，支持我，愛護我，多謝你哋。」然後她與全場歌迷大合照，留下美好回憶。
憶父親在生時教誨
活動上Sammi除了High爆與全場歌迷又唱又跳〈獨家試唱〉外，音樂會亦有感性時刻。Sammi提到爸爸時感觸得眼濕濕，並說：「我鍾意唱歌，用歌聲同自己打氣，同身邊嘅人打氣。今日好想唱畀天家嘅爸爸聽，佢以前成日都為我打氣。每次我感到氣餒，想退休嘅時候，爸爸就會為我打氣，鼓勵我。我好想唱呢首歌畀自己同返咗天家嘅爸爸。」然後她唱出陳百強的〈喝采〉，唱到眼濕濕，背向舞台拭眼淚。
完騷即破戒食薯片
音樂會尾聲，Sammi換上生日音樂會特別版Tee，勁歌熱舞〈信者得愛〉、〈Chotto 等等〉和〈煞科〉後，歌迷大嗌Encore。她笑言自己年紀大跳到攰，但不敵歌迷熱情，即興加唱〈愛的輓歌〉和〈終身美麗〉，為迷你音樂會畫上完美句號。完場後，Sammi返入後台立即開薯片慶祝，她說：「終於可以食到朝思暮想嘅薯片，因為呢排保住把聲，終於完騷可以食同休息吓。希望今晚揀嘅歌，歌迷都鍾意，因為呢個騷完全唔係紅館演唱會形式，揀嘅歌都幾冷門。多謝歌迷今晚帶畀我難忘嘅生日會，多謝大家祝福！」
下載APP