馮寶寶和謝賢事隔60年再度合作。（資料圖片）
馮寶寶與賈曉晨（右）在片中展開婆媳大戰，其實戲外二人感情好好。（電影預告截圖）
由老牌巨星謝賢（四哥）與馮寶寶（Bobo姐）主演的香港電影《殺出個黃昏》，於上周四（15日）正式上映，上映五日錄得150萬港元（約澳門幣154萬）票房，成績愈戰愈勇。片中Bobo姐與女星賈曉晨（JJ）的婆媳大戰惹來極高討論度，片中一句對白：「人生匆匆，就係為咗等敲嗰一下喪鐘。縱使你兒女成群，都總有一個係瘟神！」一句道盡Bobo姐角色遭遇。今次亦是Bobo姐事隔60年跟謝賢再合作，電影能有好成績，相當高興。
人在馬來西亞的Bobo姐未能出席宣傳活動，她透過製作特輯表達對角色感受。Bobo姐飾演的「蔡鳳」，原本一家四口過著幸福快樂日子，卻因孫兒校網問題，導致關係破裂，更引起罵戰。Bobo姐說：「作為母親對子女嘅愛，就係冇得講回報嘅，如果佢哋講嘢唔啱聽、激氣，我會喊㗎，但我始終都係會原諒。最多咪一路喊一路祈禱，等到適當嘅時候，大家坐低落嚟，傾開個心結囉。」戲中演「惡新抱」的JJ亦借機會澄清：「我現實中唔係㗎！現實中好溫柔㗎！」
童星出身的馮寶寶與年輕時的謝賢合作《連理枝》。（電影截圖）
談到跟四哥再度同框演出，Bobo姐笑言：「60幾年冇見呀！上一次係我四歲半拍《連理枝》，我演男仔㗎，佢都未抱霆鋒就抱我喇，我今次都係為四哥先拍！」談到對四哥印象：「英俊瀟灑、倜儻，永遠都係第一男主角。」
馮寶寶談到今次角色爆發力驚人，處理時壓力不少。（電影劇照）
談到今次角色爆發力驚人，處理時壓力不少，Bobo姐坦言：「我明白監製（林家棟）嘅要求，咁啱我好享受喺工作上別人對我有要求，我好鍾意感覺自己永遠仲有跨進一步嘅可能。」Bobo姐更表示《殺》片是演藝生涯中最珍視的其中一部作品：「《殺出個黃昏》係咁多年嚟我做幕前工作最感興趣嘅，因為呢部係可以夥拍到呢位跨世代男主角謝賢嘅一齣電影。老實講，如果唔係跨到呢個世代，我都未夠斤両配做佢嘅女主角啦！」
馮寶寶與謝賢合作的《殺出個黃昏》，講述殺手組織成員面對老人危機的故事。（電影劇照）
《殺出個黃昏》故事主要講述60年代曾是讓人聞風喪膽的殺手組織，無奈時代蛻變，三人只好脫下戰衣，重歸平凡生活。步入黃昏之年，誰願意被標籤為負資產？奈何熱血關節亦難敵機械手臂，唯有被逼熄爐，憑藉一首電台點唱的《青春之歌》，竟讓殺手組織中的三人重燃心中的一團火，三位遲暮老人決定殺出個黃昏！（編輯：黎永樂）
下載APP