黎明Keep Fit 自創風呂式減肥法

天王黎明（Leon）一連九場的香港紅館演唱會前晚（11日）進行第二場，Leon首場個唱已請來林海峰做嘉賓，更大爆黎天王不斷爆金句，惹來全場爆笑。而第二場Leon則請來鄭秀文（Sammi）擔任嘉賓，二人更高歌一曲〈信者得愛〉之餘，Leon更與Sammi分享減肥心得，Leon自爆他的Keep Fit之道就是自創風呂式減肥法，在家浸住浴減肥，就連Sammi聽完後都覺得好有畫面，引得全場爆笑。（文：黎永樂　圖：相關機構）

一向歌精舞勁的Sammi在社交網上載在紅館後台的視頻，並留言：「今夜再踏入紅館。搵返自己曾留下的腳毛。腦?馬上浮現兩年前在這裡興奮舉行Follow mi。」她又說想起跟全場觀眾瘋狂舞動瘋狂high的時候，真的感到超開心，又謂下一個演唱會又有下一個演唱會的新意念。而Sammi唱〈信者得愛〉時，Leon都有跟著又Rap又跳，令現場觀眾睇得相當興奮。

浸浴食辣麵爆汗

眾所周知，Sammi十分勤力做運動，經常分享滿頭大汗片段到社交平台，她一出場，Leon就跟她分享「出汗」心得，他說：「Sammi，你做運動Keep Fit好勤力，我見你流好多汗。咁你知唔知我點Keep Fit？（你有Keep過Fit咩？）有。（係喎，Fit咗喎！）我係用日本風呂式。（即係點？）首先開個Bath。（除唔除衫？）除衫，然後浸落去。（嘩，好有畫面喎！）諗住自己喺日本，聽風呂音樂浸20分鐘，起身著返件浴袍，房入面開28度空調，食碗辣麵，坐15分鐘，成身流晒汗，肯定冇咗三至四磅。（包你流埋鼻血添呀！）唔會啩？（每個程序都咁熱辣辣。）」

Sammi：好有畫面

Sammi又笑說：「又浴缸又除衫，好有畫面，見到你啲肥肉呀！依家冇，依家好Fit！」Leon說：「肥肉會慢慢變少，水分嚟啫！」Leon再向Sammi請教節食減肥，他說：「有啲人減肥，每日只食一粒豆，你有冇試過？」Sammi說：「一粒豆？減肥？呢個唔係減肥法，係減壽法喎！一日一粒豆真係唔掂，起碼食兩粒，早晚各一粒，飽啲！」Sammi續說：「好多人都以為我不斷減肥，其實我依家做嘅功課唔係減肥係Keep Fit，做運動和食得健康，最緊要健康，肥嘅瘦嘅都唔緊要。今日嚟到呢個舞台見到你，依然咁靚仔！」

爆黎明應承拍MV反口

講到興起，Sammi爆料：「我要爆黎明少少嘢，佢唔知由幾時開始個人好飄，好迷離。幾年前佢打電話俾我，話想幫我監製一首歌。我心諗：乜你識監製歌嘅咩？心裡滿是疑問，不過見你係黎明就好啦！然後你搵咗你老友又係我老友Mark（雷頌德）幫我寫咗首歌〈犀利〉，我記得你仲話要幫我拍MV。MV？於是我上網查吓你拍過咩MV。點知有一日，你又話我知唔得閒，唔幫我拍MV啦！嘩，乜你咁飄架？你啲節奏好難跟呀！」Leon坦言：「我知我成日講嘢斷片，生活都係咁。（啲人話生咗仔會無記性。）又唔係我去生。（生女可能會好啲。）可能係，哈哈哈！」

黎明已表明每晚開騷都會為入場粉絲帶來歡笑。

黎明邀請鄭秀文擔任第二場紅館騷嘉賓。

黎明與鄭秀文表演時又Rap又跳，全場觀眾睇得勁High。

胡楓都有來睇契仔黎明演出。

黎明在個唱表演時，也帶來震撼的舞台效果。