廣闊藍天同遼闊土地，喺澳門就難得一見，有時更要成日對住灰濛天空同污濁海水，唔想咁灰，就要遊返轉澳洲中部。當地有非常搶眼的紅土中心、著名巨石烏魯魯（Uluru）、充滿原始藝術氣息的愛麗斯泉（Alice Springs）小鎮，還有荒漠、峽谷等各種蔚為奇觀的自然景色，再加埋可愛到爆的袋鼠同高大駱駝，真係睇到人嘩嘩聲，未出發先興奮。另外，當地9月底將會舉辦第一屆「Parrtjima-A Festival inLight」燈影節，而且只得十日，要去睇就咪執輸喇！
爬到上帝王峽谷，人變到好渺小，好似畀個美景「食」咗一樣！
澳洲這個月份正值由冬轉春季之間，中部地區20零度的氣溫好舒服，雖然夜晚會跌到得返幾度，溫差較大，但總比起夏天40幾度更適合遊覽，因為有些地區會因天氣太熱而關閉。澳洲中部大得出奇，135萬平方公里的土地充滿驚喜，其中AliceSprings小鎮最傳奇，被廣漠包圍，又同時蘊藏原住民和歐洲殖民的歷史，時常有各種節日和慶典。小鎮內亦有好多熱鬧的藝術畫廊和藝術中心，例如Todd Mall，可以欣賞原住民（Aboriginal）的畫作，探尋甚具當地風土特色的藝術。
天然超級巨石Uluru，就係澳洲中部著名地標，望住巨石歎香檳，真係一生何求。
Uluru天然超級巨石
Alice Springs當地其實有好多旅行團，有一日或三日兩夜，甚至五六日可以揀，而一般都一定會去睇一座著名巨石──烏魯魯（Uluru）。巨石位處烏魯魯卡塔丘塔國家公園（Uluru Kata Tjuta NationalPark）內，是全世界數一數二最大單體石，高達348米，矗立於荒漠之中，非常壯觀，亦係原住民的聖地。不過，攀石就太危險了，甚至有人因此跌死，但其實圍住巨石齋行，就已經超有睇頭，因為石上的砂岩含有大量鐵粉，氧化後變成艷紅色，加上時間變幻顏色亦會變化，令巨石零死角地靚爆，黃昏時顏色更加奪目。行的時候更要落足眼力，因為巨石上隨時可以見到有估計超過千年悠遠歷史的壁畫，聽導遊講解，原來每個都有象徵意義。而由於烏魯魯附近實在係杳無人煙，所以旅行團一般會安排遊客在國家公園外紮營，在紅土中心席地而睡，咪就係有型囉。
巨石Uluru底下，有時會見到呢啲珍貴壁畫，有過千年悠久歷史。
天大地大帝王谷
澳洲中部的天然景致簡直係無敵，位於烏魯魯東北面的帝王峽谷（Kings Canyon），在瓦塔卡國家公園（Watarrka National Park）內，放眼望去仍然係一片赭紅。砂岩有成100米高，而且好陡峭，崖上更無圍欄，徒步上峽谷高頂都要兩三小時。不過為咗眼前絕美風景，真係所有汗水都值得，因為可以睇盡幽深峽谷、紅土沙漠，甚至沙漠綠洲，真係隨便見到一灘岩石間的湖水，都會令人驚豔，走過一次就一生無憾。
在帝王峽谷岩石間的一灘湖水，倒映藍天紅石，靚到一個點。
騎駱駝做沙漠梟雄
一場嚟到，當然要入鄉隨俗，騎駱駝穿越沙漠。距離Alice Springs不到30分鐘車程，就有Pyndan CamelTracks駱駝場，騎一小時駱駝橫越荒漠做沙漠梟雄不是夢，重可以影相呃Like。原來駱駝係澳洲中部嘅新移民，200多年前，白人想征服這片土地，就由中東和印度引入首批駱駝，讓牠們開拓荒漠，所以其實係一段辛酸史。除此之外，袋鼠保護區（Kangaroo Sanctuary）亦好值得去，因為中部不少野生袋鼠在公路上被車撞死，令袋中袋鼠BB變成孤兒，而保護區就是收留牠們的地方，所以亦不妨去探下袋鼠BB。
當地有駱駝場，可以付費騎駱駝橫越沙漠，騎在駱駝上都幾顛簸下喎。
去到袋鼠保護區，可以餵一下媽媽因車禍死去而變成孤兒的袋鼠BB，給牠們一點愛。
實用資料
簽證：持有效特區護照，可於網上申請澳洲短期逗留簽證，可停留90天或以上
網址：www.immi.gov.au/visitors
貨幣：AUD 1 約兌MOP 6
時差：快2小時
氣溫：早晚溫差大，現為冬季溫度約3℃至20℃
電壓：224V（八字型插）
交通：澳洲城市如悉尼、凱恩斯等地，每日有航班飛到Alice Springs，到埗後參加當地旅行團，即可遊覽上述景點。
InfoUluru-Kata Tjuta National Park
地址：Lasseter Hwy, Uluru NT 0872, Australia
網址：www.parksaustralia.gov.au/uluru
同場加映
Parrtjima繁星下燈影藝術
澳洲中部廣闊無垠，夜晚更滿天繁星，今個9月，Alice Springs更舉行第一屆大型燈影節「Parrtjima-AFestival in Light」，來一次土著藝術和燈光科技的碰撞。一連十日，將會有各式裝置藝術，照亮超過250公里的麥克唐奈爾山脈（MacDonnell Ranges）。原來「Parrtjima」這個名字源自「Parrtma」，在當地有「點亮」的意思。由當地藝術家、社區、學生等，共同創作的燈光裝置藝術，將會以最新科技，在這個有300億年歷史景觀的天然畫布上，講述古老故事。主要展區在Alice Springs Desert Park，其中有一系列充滿1950 年代特色的圓布裙（Circle skirts），由當地著名原住民畫家Albert Namatjira的孫女Lenie及一眾藝術家用水彩繪成，非常有藝術特色。
第一屆「Parrtjima-A Festival in Light」，結合原始藝術和燈光科技，別具意義。 （相關機構圖片）
Info
Parrtjima-A Festival in Light
日期：9月23日至10月2日
時間：1830-2230
地址：Alice Springs Desert Park, NT, Australia
網址：www.ParrtjimaAustralia.com.au
下載APP