鄭俊弘 何雁詩 疫下婚事多波折

鄭俊弘本周六準備迎娶何雁詩，一對準新人婚前相當興奮。

一班姊妹團準備在何雁詩（中）結婚當日玩轉伴郎團。

何雁詩表示結婚前一日都有工作，她亦出現緊張狀況。

有指何雁詩（左）的爸爸（左二）是物流界大亨，估計身家至少有六億港元。

何雁詩和鄭俊弘的婚禮可謂一波三折，不過兩人都順利解決。

拍拖近三年半的鄭俊弘（Fred）與何雁詩（Stephanie）將於今個周六（7日）正式拉埋天窗，兩人近日表現都相當興奮。不過昨日（4日）就有報道指兩人在疫情下舉辦的婚禮可謂一波三折。兩人年初宣布訂婚時，本來打算今年底在美國酒莊進行婚禮，可惜因當地疫情嚴峻而轉改香港舉行；原本香港婚禮場地已經訂好，豈料婚禮前幾日，又傳出場地有變的消息！據聞，二人原本屬意在一間歐陸式餐廳舉行婚禮，但該餐廳忽然坐地起價，獅子開大口開出「不能接受」的天價，最終要臨時轉場。（文：黎永樂 ）

待嫁新娘何雁詩原本準備迎接她的大日子，不過想不到她與鄭俊弘婚前遇上不少阻滯，有指兩人所訂的婚禮場地是一間歐陸式餐廳，但餐廳即採取「拖字訣」，遲遲不肯報價，直到最後限期時才回覆二人，最離譜是餐廳負責人未知是不是知道兩人是有知名度的歌手，一於獅子開大口，開出二人都不能接受的價錢，令他倆嬲到爆之餘又要臨時臨急另覓新場地，幸好最後落實在沙田一間酒店的戶外園林草地上行禮。

臨時臨急另覓新場地

Stephanie上電台宣傳新歌時亦承認此事，她表示：「我哋本來諗住簡單啲喺同一個餐廳入面搞掂晒，但係唔知係咪因為我哋都好Last minute（處理），咁個價錢真係好高好高、好唔合理，咁所以最尾臨一個禮拜前就改咗我哋行禮嘅地方。我又無嬲嘅，但係處理呢啲手續就會比較複雜少少啦，好彩我同Fred性格都唔算太過分緊張，亦好彩身邊啲姊妹同公關都好幫我哋囉，好多嘢都唔需要擔心。」

準女婿被封「六億駙馬」

另外，近日亦有報道指，Stephanie的爸爸是物流界大亨，家境富裕，十分有米，何爸爸不但在內地有多間分公司，在香港亦有三個約值逾6,000萬港元的物業，身家估計至少有六億港元，未來老婆身家豐厚，故Fred被傳媒冠以「六億駙馬」之稱。對此，Stephanie 就坦言不知父親有多少身家：「我哋係財政獨立，希望爸爸嘅錢自己儲番，退休舒服啲。（Fred有冇唔開心？）唔知佢睇咗報道未，但我哋都睇得好化，最緊要同屋企人關係好。（結婚爸爸有冇幫手？）有啲嘢需要佢幫手，雖然疫情下我哋嘅收入都好低，但大部分都係我哋自己畀。」

出動「冰火」玩轉伴郎團

Stephanie亦分享了婚前的「小插曲」故事，她笑說：「其實到結婚前一日都仲做嘢，如果我喺屋企嘅話就會緊張！好似尋晚仲發惡夢，夢到我同初戀男友結婚，真係好擔心，好彩起身見到Fred喺隔籬先即刻放心晒！」她也透露婚禮細節已大致落實，問到是否已想好玩新郎環節？她笑笑口表示：「希望盡量短暫時間內用痛苦啲嘅形式完成。（好捨得玩Fred？）其實主要都係玩伴郎團，張頴康嗰啲就要辛苦啲，對於玩佢我好捨得！總之甜酸苦辣、冰火都會有！」