薛凱琪擇偶 唔要靚仔要幽默

薛凱琪強調對感情婚姻仍憧憬，並表示抗拒被標籤為「盛女」。

薛凱琪重回華納後推出頭炮廣東歌，請來關智斌合作。

〈南昌街王子〉是Fiona童話系列最後一首歌。

薛凱琪重申和方大同只是閨蜜關係。

房祖名亦是薛凱琪緋聞男友之一。

現年38歲的薛凱琪（Fiona）2003年加入樂壇，由華納唱片一手捧紅。事隔七年後，Fiona回巢娘家，兼推出頭炮廣東歌〈南昌街王子〉，這亦是著名填詞人黃偉文（Wyman）為她創作童話系列最後一首歌。Fiona坦言年少時活在童話世界，自爆拍過四次拖，現在擇偶不用靚仔，識搞笑最緊要。雖然四段情均無好結果，但Fiona強調對感情婚姻仍憧憬，並表示抗拒被標籤為「盛女」。（文：黃琪、植筱詩　圖：互聯網）

日前，Fiona接受香港媒體訪問，回應2018年約滿黃柏高太陽娛樂之後，先後有傳麥浚龍、古天樂均曾以天價力邀過檔，她說：「係有傾過其他公司，但報道所講嘅人，唔係我講，同埋因為而家簽咗約，要尊重華納，之前傾過邊間公司，我亦唔會講。」對於為何最後重回華納，Fiona坦言是因為之前合作過有默契：「我哋合作過，唔使裝飾啲咩，佢哋亦了解我最想盡快出歌。」

自認多元化工作狂

近年Fiona重心轉移北上發展，她承認曾被歌迷投訴出歌少。不過，她強調在內地拍戲、拍劇多了，不代表只為錢看：「之前出歌少咗，只係因為我對出歌有要求，也有派過〈週末畫報〉、〈冷笑話〉呢啲好歌。之前嘅公司唔同華納，係冇得比較嘅，好難揀我鍾意電影定音樂多啲，我係一個多元化工作狂，拍戲多咗當然會有歌迷投訴，但我人只得一個，只係想帶快樂畀大家。」

童話系列最後一曲

Wyman為Fiona作品填詞已有18年，過往一直有以童話為主題的作品，不過他有感人長大後需要往前看，決定以〈南昌街王子〉作為Fiona童話系列最後一首歌。Wyman近日在社交平台解釋新歌歌詞大意指：「有種成熟，叫做走下南瓜車，不找獨角獸。因為人長大了，你終於明白，冇雷公咁遠的奇洛李維斯，不如實在有揸手的南昌街王子！」對此，Fiona笑指：「我知道你說過此後是人生另一章節，但當我60歲還在唱的時候可不可以再寫一個關於老人家的童話給我回憶一下。求求你！」

澄清與方大同緋聞

提到感情世界，Fiona表示從少就有寫日記習慣，年少時活在童話世界，一直夢想有白馬王子出現：「我18歲就幻想過自己30歲前會結婚，我拍過四次拖，好彩冇同嗰啲人一齊，當然曾經畀人呃過，但點樣呃就唔講喇！而家嘅擇偶條件，唔使靚仔，外表可愛識搞笑就夠。」被問到方大同、房祖名這兩位前緋聞男友都符合條件？Fiona笑說：「佢哋只係我嘅好閨密。你知唔知，我呢啲有幾珍貴同罕有。做人最緊要有希望，對感情都係，呢啲就係吸引力法則。」