當年TVB有個節目叫《殘酷一叮》唔知大家仲記唔記得，每集搵嚟大眾市民上台表演，每一秒演出就有100元，成功吸引唔少多才多藝嘅普通人參加。而當年其中一位參賽者莫凱謙，佢當年只得六歲，而佢就獻唱容祖兒嘅〈習慣失戀〉，當時就客席評判嘅劉德華喺聽完歌之後，就問莫凱謙知唔知乜嘢叫失戀？莫凱謙答：「知！即係男同女分開咗。」劉德華就話：「嗰啲叫分手，唔係失戀。」而莫凱謙搞鬼咁講：「都係唱下歌玩下啫！」結果令劉德華無言以對。
今年，莫凱謙已經18歲兼且讀緊大學，而佢亦冇放棄音樂，近日喺網上玩直播自彈自唱，重唱容祖兒嘅〈習慣失戀〉，唔少網民聽完都話唔錯！有傳莫凱謙嚟緊仲會拍戲兼唱《少年警訊》主題曲，睇嚟準備加入娛樂圈發展！
下載APP