郭富城憶亡母不禁哽咽

郭富城為舞蹈員及電影界手足籌款，舉行慈善音樂會，並在網上免費直播。

郭富城一向侍母至孝，可惜今年2月郭媽媽與世長辭。

繼歌神許冠傑早前舉行Online騷為全球華人打氣後，今個周六（9日）下午5時開始，郭富城（城城）會在香港舉行「郭富城鼓舞．動起來Online Concert 2020」，為近期因新冠肺炎疫情導致零收入的舞蹈員及電影界手足籌款。協助城城舉辦今次演唱會的鄭丹瑞（阿旦），為宣傳抗疫騷早前訪問了城城，當中侍母至孝的城城，談到已經過世的郭媽媽時，他不禁哽咽起來。最後他更寄語觀眾記得今個星期日母親節，要為大家身邊的母親做返啲嘢。（文：黎永樂）

天王郭富城為幫助受疫情影響生計的舞蹈界及電影幕後同業，他發起網上慈善演唱會，並於5月9日舉行。城城日前接受阿旦的網上節目訪問，阿旦說上次訪問對方已是13年前的事，當年城城仍是單身寡佬，現在已經是兩女之父，連形象也變得成個慈父一樣。城城表示：「呢樣嘢好自然，人去到某個階段，係年齡嘅增長，唔同階段會想做唔同嘅嘢，係生活嘅改變，每一個人都會經歷。」他又指自己得到「最佳男主角」時，認為生活要有改變，要有一個穩定的生活，他說：「加上媽媽年紀開始大，佢一直都想睇到我成家立室。」說到此時，城城開始哽咽起來。

獲郭媽媽鼓勵入行

城城侍母至孝，可惜今年2月郭媽媽與世長辭，故城城憶起母親時情緒有點波動，他說：「媽媽影響我好深，母愛係好偉大，爸爸走嘅時間比較早啲，喺1995年走，媽媽一直以嚟都好支持我嘅工作，由我入呢個圈時，由一個Dancer嘅時候，其實第一個係同媽媽講，因為爸爸好嚴厲，希望我可以做金行，爸爸喺金行工作，希望我畢業後繼承父業，直至我希望入訓練班時，媽媽同爸爸商量話畀個機會我試吓，唔得時再算囉，所以我入咗演藝圈做Dancer，做歌手又做演員，呢條咁長嘅路，媽媽一直都好支持。」

郭富城成家立室，有自己小朋友，終於達成媽媽心願。

郭富城提到亡母時，一度哽咽起來。

遺憾未抽時間陪伴

城城續道：「大家都希望可以陪伴自己老邁嘅母親，但係因為自己工作上嘅關係，好多時都唔可以真係做得到。我覺得呢個係遺憾嚟嘅，但係另一邊廂，媽媽睇到我有成績嘅時候，佢係安慰嘅。所以去到接近50歲時，同自己講希望媽媽有生之年，睇到我可以成家立室，有自己嘅小朋友，我諗呢個係媽媽嘅天職，希望睇到自己嘅小朋友有下一代、有自己嘅家庭，咁我終於達成媽媽心願，結婚、擁有自己家庭，最開心係有兩個寶貝女。」

寄語觀眾孝敬母親

城城又指因疫情關係，為保飯碗，已有不少舞蹈員轉行，但他亦歡迎他們加入一起演出。最後，城城趁就快是母親節，他寄語給觀眾：「希望大家睇完呢個演出之後，喺呢個禮拜到正日嘅時候唔好錯過呢一日（母親節），為你哋自己身邊嘅母親做返啲嘢，請佢哋飲餐茶又好，買個菠蘿包畀佢哋食都好，都係對母親嘅一種敬意。」