夏天去水上樂園玩係常識吧？話說最近英國公投脫歐後，英鎊大跌，而家澳門幣十元已可兌到一英鎊，經濟前景如何就無人敢講，但變相現在去英國旅行就等於減價！今夏避暑不妨飛一轉英國，去New Forest Water Park玩另類吹氣水上樂園啦！樂園全程浮在水中央，有好多你估唔到的障礙設施，一家大細又跑又跣又跌，分分鐘刺激過齋玩高空滑水梯！
英國吹氣水上樂園，在國家森林公園旁邊，玩水都玩得狂野啲！（互聯網圖片）
全英最大吹氣樂園
貴為英國首個及最大型吹氣水上樂園，營運超過25年，佔地逾20萬平方米，共十個主題、28個水上障礙，同一時間可容納百人水上狂奔。而浮台等設備更是由已近20年歷史的德國品牌Wibit Sports度身訂造，設計實在可靠。要注意樂園僅春夏季限定，一小時入場費不過15英鎊（約澳門幣150元），6至8月每日開放，9月後由周三開業至周一，10月則只有周末可以入場，要玩就要快手喇。
失驚無神又跣落水
長55米的浮水樂園Aqua Park在湖上浮下浮下，都咪話唔壯觀，玩起上嚟重驚險十足。一踩上浮水道就彈下彈下，要用盡吃奶力保持平衡，點知有人失驚無神在旁搶先走過，一失重心，又被彈落水。濕身必定在所難免，還要面對各種障礙，輕鬆小兒科有滑梯、搖搖板、鞦韆，想越級挑戰的話，就要揀彈床、單槓、水中滾輪、巨大「冰山」，甚至懸垂攀岩牆，少點體力都玩唔掂。現場會見到不少外國人急不及待大展身手，爬上攀岩牆凌空彈跳，以360°狼狽姿勢直插入水，都咪話唔爽！唔好以為只限大人入場，六歲以上身高超過110厘米的小朋友亦可落場，實行一家大細挑戰體力和膽量。
索纜滑水不一定要出海才玩到，Wake Park內有數條滑水道任你玩。
英國最大吹氣水上樂園全長55米，睇怕一個鐘都玩唔晒！
各種障礙需要以身體配合來保持平衡，一唔小心，咪又跌落水囉。
雖然這裡主打水上吹氣樂園，但其實旁邊亦有個Wake Park，可玩索纜滑水，設有兩組系統分別適合新手和老手，一齊扮有型在水中滑翔。更設專人一對一課程，即學即玩，連細路亦玩得。唔想濕身的話，可以在湖內撑艇仔，又或租用草坡露營場地，在叢林下歎世界，入夜後還可以點上營火，欣賞浪漫湖邊景色。樂園非常受當地人歡迎，去之前記得要提早上網預約啊！
兩個人一齊撑艇仔，靜靜欣賞下湖光山色亦得。
場內有營地出租，玩水玩到夜，就席地瞓番晚。
實用資料
簽證：持有效特區護照可停留六個月
貨幣：GBP 1約兌MOP 10.5
時差：夏令時間慢七小時
氣溫：7至8月溫度約14℃至25℃
電壓：220-240V（英規三腳扁插）
網址：www.goeuro.co.uk
交通：由倫敦可坐約2.5小時火車到Fordingbridge，轉乘巴士X3號，再坐約十分鐘於Salisbury站下車，即可徒步到達樂園。
New Forest Water Park
地址：Ringwood Road, Fordingbridge, Hampshire SP6 2EY, England
網址： www.newforestwaterpark.co.uk
韓國都有吹氣水上樂園
無時間去咁遠，亦有短線遊選擇，韓國春川市被譽為湖濱之城，是水上活動熱門地。雖然春川市的吹氣水上樂園RIVER PALACE Water Park規模無英國咁大，但勝在於遼闊河川上玩。樂園同樣有彈床、巨型「冰山」、搖搖香蕉艇和滑梯等，另外還有水上單車，好似輕功水上飄，邊踩單車邊望住旁人變落湯雞，都不知幾逍遙。
Disco Boat巨型陀螺水泡，一班朋友一齊玩，睇下邊個最快跌落水。（互聯網圖片）
吹氣滑梯遇著水，滑上加滑，連大男人都玩到一仆一碌！
更好玩有超巨型水上Blob Jump，貌似枕頭形吹氣彈床，一人攤在彈床前面，另一人從高空跳下來，空氣彈力可以將前面的人彈射到幾丈遠，再撻返落水。更刺激有Disco Boat巨型陀螺水泡，一次可坐15人，由快艇扯住在水上極速飄移，同時像飛碟一樣瘋狂自轉，速度快到可以輕易將你拋落海。樂園都好受韓仔韓妹歡迎，去玩前記得要預約。
RIVER PALACE Water Park
地址：韓國江原道春川市南山面芳荷里366-1
網址：http://rvpalace.co.kr
下載APP