楊千嬅與黃浩然有多場吻戲，她指兩人相識多年不會尷尬。
楊千嬅主演的新戲首播後，引來大批觀眾熱議。
陳庭欣走到溫泉赤裸全身，跟楊千嬅攤牌。
楊千嬅直言劇本寫得細膩，相信女觀眾一定有共鳴。
由楊千嬅、周柏豪、黃浩然及陳庭欣等主演的TVB台慶劇《多功能老婆》，前晚（25日）首播。楊千嬅相隔17年再拍TVB劇，扮演家庭主婦的她與老公黃浩然飾演恩愛夫妻，一開場已經咀不停。但萬萬估不到黃浩然竟然唔知足，收埋「小三」陳庭欣。陳庭欣更主動踩場，走去溫泉赤裸全身，跟正印攤牌。千嬅直言劇本寫得夠細膩，帶出女士婚後如何平衡家庭及事業，相信女性觀眾會有共鳴。 （文：植筱詩）
該劇由資深創作人陳寶華擔任總監製及編審，情節非常吸引，收視有保證。日前播出的首集中，講述飾演全職主婦的楊千嬅與老公黃浩然表面十分恩愛，但老公其實收埋「小三」。黃浩然與陳庭欣飛到日本偷食時，更被千嬅與兩位好姊妹陳煒及朱晨麗撞正，但千嬅仍懵然不知。後來黃浩然欲撇甩陳庭欣，激發她大報復，踩到溫泉赤裸裸與正印攤牌。千嬅才如夢初醒，知道老公對她不忠。
陳庭欣露背又露股
鏡頭前千嬅只是露肩， 但陳庭欣就大露背兼露股邊，還有長腿大特寫，鏡頭前十分性感。她受訪笑說：「拍嘅時候係有著褲嘅，後期製作真係厲害，自己睇到都嚇咗一跳，哈哈。」周柏豪則好期待新劇播出：「好記得呢套劇喺上年3 月時開拍，去到依都有年半時間，喺劇裡面我同黄浩然、洪永城有打交又鬧交嘅場面，當中有血有淚，成套劇好有人情味，所以首播時都有同屋企人一齊睇。」
曾合作拍戲有默契
提到千嬅與黃浩然有多場吻戲，千嬅指兩人相識多年又曾合作拍戲，所以不尷尬：「我哋都有家庭同小朋友，好理解角色，所以拍夫妻生活戲好自然。其實拍完套劇對真實生活都有影響，多咗思考空間。」她指自己拍過不少愛情片，但拍夫妻相處戲又再去到另一個層次：「電視劇有足夠長度畀角色成長，容許我演得更細緻。我和黃浩然、周柏豪嘅感情戲，或者姊妹感情戲都好好睇，好貼近生活，同黃浩然幾場鬧交戲都不同層次。」
下載APP