今屆歐國盃真係爆冷連場，賽前被睇低一線嘅威爾斯，今晨歐國盃八強戰面對爭標熱門比利時，喺先失一球下，最後竟然連入三球反勝，爆冷闖入四強，贏波後嘅威爾斯，將與葡萄牙爭入決賽！
上半場13分鐘，比利時中場尼恩高蘭一記35碼冷箭怒轟死角入網領先。30分鐘，威爾斯憑角球攻勢，艾殊利威廉斯近門頂入，追和1比1完半場。
換邊後55分鐘，威斯爾中場艾朗藍斯右路底線傳中，笠臣簡奴於12碼位控定，以一記「告魯夫轉身」擺脫三名後衛，然後冷靜射破比利時門將泰拔高圖爾斯十指關，助威爾斯反超前2比1。完場前5分鐘，威爾斯再靠後備上陣嘅禾基斯接應基斯根達傳中頂入，威爾斯終以3比1取勝。
27歲嘅笠臣簡奴，出身於阿仙奴青訓，先後踢過阿仙奴及雷丁，但表現平平，上季完結後，更被雷丁放棄，到目前為止仲未有球隊落班。但天無絕人之路，呢位身高1米85嘅翼鋒，先於歐國盃分組賽對斯洛伐克攻入致勝一球，成為出線功臣；到今晨八強更使出「神級轉身」入波，助威爾斯歷史性打入四強，睇黎應該好快就脫離失業大軍。
下載APP