陳山聰身穿白色背心大晒麒麟臂。
陳山聰將於11月1日迎娶拍拖五年的圈外女友。
陳山聰經常會帶Apple（中）出席好友聚會。
現年43歲的陳山聰憑無綫劇集《金宵大廈》演保安員阿蕭，人氣再度急升，首次擔正男主角即大受歡迎，有望今年爭視帝。山聰事業愛情兩得意，他將於下月1日迎娶拍拖五年的圈外女友Apple，近日已陸續派喜帖給親友。早前，他與Apple特別飛到法國拍攝婚紗照，相中兩人以多個造型示人，面上更流露出無限的幸福，山聰望住Apple的眼神簡直是甜到漏，再加靚景配襯，畫面非常浪漫。 （文：植筱詩）
近年努力練跑的山聰，影婚照時身穿白色背心大晒麒麟臂。他表示和太太拍拖五年以來，甚少為對方做浪漫的事情，所以今次拍婚紗照，希望能帶她到一個浪漫的地方影相補救，給對方一個美好的回憶：「法國係一個我相信大部分女仔都會鍾意嘅地方，加上太太以往未去過法國，所以好想同佢喺呢度，影一輯靚靚婚紗相，成為我同佢之間一個最美好同難忘嘅回憶。」
獲不少好友相助
今次拍攝婚紗相，山聰笑言出盡人情牌，獲不少好友相助，令他能夠用最有限的預算，做到最佳、最滿意的效果，可謂落足本錢。山聰說：「攝影師Frankie係幫袁偉豪影寫真嘅攝影師，亦係我哋嘅好朋友。化妝師同髮型師都係一向合作開嘅兄弟班。」至於服裝方面，山聰就多得胡杏兒穿針引線：「佢哋婚紗店送咗一套由老闆親自設計嘅婚紗，連裙上面嘅喱士都係由法國運返嚟做。」
出重金購買禮服
山聰又透露自己套禮服是出重金購買：「大家都知我係貪靚鬼，好彩有蘇永康同佢太太仗義幫忙，我先得到呢套好有型嘅禮服。」問到世紀婚禮的預算？山聰說：「呢個美好回憶係唔可以用錢去衡量，婚紗相出嚟嘅效果好滿意，只要係能力範圍內做到，一定要令太太開心，希望大家睇到都鍾意。」他表示11月1日的婚禮以簡單形式進行，最重要是家人和最好的朋友在場，與眾人分享喜悅，就是最美好的一晚。
否認未婚妻懷孕
從婚照可見，Apple不時側身企，靠近山聰，疑似刻意遮肚，另一張黑白婚照，Apple又用手摸一下肚仔。問到是否雙喜臨門？山聰否認：「梗係唔係啦，唔好話佢肥啊，佢好傷心.。佢又唔係藝人，你哋睇慣Angelababy呀，所以覺得佢腰粗囉。佢只係擺隻手喺肚度，有嘅而家都大晒啦，仲點出嚟見人。」會否考慮生小朋友？他說：「隨緣，聽天安排，如果個天畀一個我哋，我哋都好樂意去接受。」
下載APP