珠寶行打劫戲惹恐慌

古天樂在片中飾演劫匪， 到「利生珠寶行」打劫。

古天樂和宣萱在片中有感情線。

飾演女警的顏卓靈自言首次拍開槍戲。

古天樂（古仔）、張繼聰、宣萱、姜皓文（黑仔）、顏卓靈等主演，爾冬陞監製的新戲《犯罪現場》，將於下月上映。片中其中一場在香港佐敦鬧市實境拍攝的重頭戲「珠寶金行搶劫」，耗資七位數字搭建了以假亂真的「利生珠寶行」，為了這場搶劫戲，更封鎖部分佐敦道及彌敦道進行拍攝馬路狂奔戲分，甚至惹來不少附近街坊以為發生真實打劫事件，認真誇張。 （文：植筱詩）

新戲劇情講述古天樂飾演的劫匪，夥同黨凌文龍、李璨琛、吳浩康及張松枝到「利生珠寶行」打劫，飾演警察的黑仔帶領顏卓靈等警員追捕，拍慣槍戰動作片的古仔表示：「好多時我哋拍戲都係借個廠景，好少真係喺鬧市取景，今次租咗個鋪位，實境搭咗間珠寶店出嚟，個感覺好真實，震撼性好大。」

古仔揸機關槍狂掃射

講到拍攝的難處，古仔坦言最緊要是爭取時間，他說：「最緊要快，因為涉及街燈，夜晚12點過後，街道好多街燈、霓紅燈都熄。好多景要封街拍，拍嗰晚都引起咗啲恐慌，大家都真係以為有人打劫，我個角色要揸支機關槍係咁掃，感覺比較少有。」

假珠寶店遊客上當

黑仔大讚珠寶行可以以假亂真：「真係唔係誇口，我哋啲道具搭景真係神乎奇技，有兩個遊客走入嚟想買珠寶，我哋同佢哋講話係拍戲。我咁大個仔第一次喺佐敦道開對頭車，仲要開槍。」而演女警的顏卓靈自言首次拍開槍戲，兼在彌敦道和佐敦道交界狂奔追賊，令她當時心情很緊張。