日前，PlayStation邀請12位名人大玩Cosplay，除咗曾江嘅司令造型演得維肖維妙，最令網民驚喜嘅，莫過於鄭希怡（Yumiko）化身美國黑人女星Tiffany Pollard。由於該黑人女星一直係網上娛樂紅人鄭列瓊（瓊姐）嘅頭像圖案，原名同樣叫鄭列瓊嘅Yumiko，今次可謂名正言順向瓊姐挑機，就連瓊姐亦於Facebook專頁轉載照片自抽，認真搞笑。
前後總共花咗四個鐘時間化妝，終於成功化身「瓊姐」嘅Yumiko就搞笑咁話認唔到自己，就連佢嘅寶貝女梁浸浸都認唔出媽媽。佢喺Instagram話：「唔只梁浸浸認唔到我， 我媽媽都認唔到我，樓下看更都認唔到我。」由於Yumiko嘅造型幾可亂真，就連瓊姐見到都即時轉貼，仲發文搞鬼咁話：「終於以真面目見大家。我係咪好索呢？ Keep唔Keep到黑妹嗰陣霸氣？」
鄭希怡（右）化身黑人女星，向娛樂紅人瓊姐挑機。
鄭希怡花咗四粒鐘時間，終於成功化身「瓊姐」。
下載APP